पुणे टाइम्स मिररची मुंबई आवृत्ती सुरू, प्रभादेवीच्या सिद्धिविनायक मंदिरात शुभारंभ

पुणे टाइम्स मिररने देशाच्या आर्थिक राजधानीत, म्हणजेच मुंबईत, आपली आवृत्ती सुरू केली आहे. शुक्रवारी प्रभादेवीतील श्री सिद्धिविनायक मंदिरात हात जोडून आणि बाप्पाचा आशीर्वाद घेऊन वृत्तपत्राच्या मुंबई प्रवासाची सुरुवात झाली. कोणताही मंच नव्हता आणि कोणताही झगमगाट नव्हता. ज्या शहराला आता आपले म्हणायचे आहे, तिथे वृत्तपत्राची टीम गणरायासमोर नतमस्तक झाली.

संचालिका शीतल बियाणी आणि मुख्य संपादक प्रियांका शर्मा यांनी पूजा आणि प्रार्थना केली. कोणतेही चांगले काम सिद्धिविनायकाच्या दर्शनाने सुरू करण्याची परंपरा जपत त्यांनी मुंबई आवृत्तीचा औपचारिक शुभारंभ केला. दर्शनानंतर मुंबईतील वाचकांना निर्भीड, ताज्या आणि दर्जेदार बातम्या देण्याचा संकल्प टीमने केला.

मनमोकळ्या स्वभावासाठी ओळखले जाणारे जॅकी श्रॉफ यांनी आपल्या नेहमीच्या आपुलकीने या वृत्तपत्राचे स्वागत केले. "पुणे टाइम्स मिररचे मनापासून अभिनंदन! आपली मुंबई, तुमची मुंबई, तुमचे मनापासून स्वागत आहे. कोणत्याही वृत्तपत्रासाठी शुभारंभ हा मोठा सोहळा असतो. पण पुणे टाइम्स मिररने झगमगाटाचा कार्यक्रम टाळून मंदिरात शुभारंभ केला, याला खूप खास महत्त्व आहे. जय हिंद, जय महाराष्ट्र!" असे ते म्हणाले.

अभिनेते आणि प्रसिद्ध छायाचित्रकार मिलिंद गुणाजी हे महाराष्ट्राचे पर्यटन आणि संस्कृती यांचे आजन्म चाहते आहेत. त्यांनीही व्यवस्थापन आणि संपादकीय टीमचे अभिनंदन केले. "पुणे टाइम्स मिररच्या मुंबई आवृत्तीसाठी माझ्या मनापासून शुभेच्छा. 30 ऑक्टोबरला हे वृत्तपत्र स्वतःच्या हातात घेऊन वाचायला मी खूप उत्सुक होतो. पुणे टाइम्स मिररने शुभारंभ श्री सिद्धिविनायक मंदिरात माझ्या हस्ते केला, याचा मला खूप आनंद आहे," असे ते म्हणाले. मुंबईतील वाचकांसाठी हे वृत्तपत्र काहीतरी नवे आणि रंजक घेऊन येईल, असा विश्वासही त्यांनी व्यक्त केला.

भाजप महिला मोर्चाच्या प्रदेशाध्यक्षा आणि आमदार चित्रा वाघ उद्घाटनाला खास उपस्थित होत्या. बाप्पाचे दर्शन घेतल्यानंतर त्यांनी माध्यमांशी संवाद साधला आणि वृत्तपत्राच्या नव्या वाटचालीचे कौतुक केले. "नेहमीप्रमाणे पुणे टाइम्स मिररने आपली निष्पक्ष पत्रकारिता जिवंत ठेवावी आणि सर्वसामान्यांचे प्रश्न, समस्या आणि हक्क ठामपणे मांडावेत. पत्रकारिता हा समाजाचा आरसा असतो, म्हणून या वृत्तपत्राने सामान्य जनतेचा आवाज म्हणून काम करावे. पुणे टाइम्स मिररच्या मुंबईतील नव्या प्रवासासाठी आणि पुढील यशस्वी वाटचालीसाठी माझ्या मनापासून शुभेच्छा," असे त्या म्हणाल्या.

बियाणी यांच्यासाठी वचन सोपे आहे, पण जबाबदारीचे आहे: पुण्याची विश्वासार्हता मुंबईत घेऊन जाणे. "पुण्यात आम्ही जी विश्वासार्हता कमावली आहे, तीच मुंबईत दाखवायची आहे. मुंबई-ठाण्यातील मोठी बातमी असो किंवा एखाद्या गल्लीतील सामान्य माणसाची अडचण, आमचा कॅमेरा आणि आमची लेखणी प्रत्येक घटनेवर लक्ष ठेवणार. कोणाच्याही दावणीला न बांधलेली, रोखठोक आणि सत्य मांडणारी पत्रकारिता हीच आमची ओळख आहे. समाजातील शेवटच्या घटकाला न्याय मिळेपर्यंत आम्ही आवाज उठवत राहू. पुणे टाइम्स मिरर आता मुंबईकरांचे हक्काचे निर्भीड व्यासपीठ बनेल. हा माझा शब्द आहे!" असे त्या म्हणाल्या. बियाणी या पुणे टाइम्स मिरर आणि सिव्हिक मिररच्या संचालिका आहेत.

अचूक, वेगवान आणि लोकहिताच्या पत्रकारिता करून पुणे टाइम्स मिररने थोड्याच काळात पुण्यातील वाचकांची मने जिंकली आहेत. आता हे वृत्तपत्र मुंबईच्या वेगवान आणि गजबजलेल्या दुनियेत उतरत आहे. नव्या आवृत्तीत शहरातील नागरी प्रश्नांसह मनोरंजन, उद्योग, लाइफस्टाइल आणि स्थानिक बातम्यांचा समावेश असेल.