पुणे पदवीधर, शिक्षक निवडणूक: दोन्ही उमेदवार जिंकतील, चंद्रकांत पाटील यांचा कोल्हापुरात दावा

पुणे विभागातील पदवीधर आणि शिक्षक मतदारसंघासाठी आज मतदान सुरू आहे. उच्च व तंत्र शिक्षण मंत्री चंद्रकांत दादा पाटील यांनी सकाळी कोल्हापुरात मतदान केंद्रांबाहेरच्या बूथना भेटी दिल्या. मतदानासाठी आलेल्या मतदारांना त्यांनी गुलाबाचे फूल देऊन त्यांचे स्वागत केले.

त्यानंतर पत्रकारांशी बोलताना पाटील यांनी महायुतीचे दोन्ही उमेदवार जिंकतील, असा विश्वास व्यक्त केला. शिक्षक मतदारसंघात शिवसेनेने उमेदवार दिला असला, तरी त्याचा काही उपयोग होणार नाही, असे ते म्हणाले. पुणे पदवीधरमधील उमेदवार स्मिता जाधव आणि शिक्षक मतदारसंघातील कौस्तुभ गावडे हे दोघेही एकतर्फी, म्हणजे 50 टक्क्यांपेक्षा जास्त मते घेऊन जिंकतील, याबद्दल माझ्या मनात शंका नाही, असे चंद्रकांत पाटील यांनी सांगितले.

रवींद्र धंगेकर यांच्या भूमिकेबद्दल त्यांना विचारण्यात आले. त्यावर महायुती म्हणून काम करताना माझ्यासह सर्वांनी सांभाळून बोलले पाहिजे, अशी प्रतिक्रिया पाटील यांनी दिली.

मनोज जरांगे पाटील यांनी व्हायरल केलेल्या ऑडियो क्लिपबद्दलही पाटील यांनी शंका व्यक्त केली. ही क्लिप AI ने तयार केलेली असू शकते, असा संशय त्यांनी बोलून दाखवला. अशा क्लिपवर महायुतीतील नेत्यांनीही खात्री केल्याशिवाय लगेच प्रतिक्रिया देऊ नये, असे आवाहन त्यांनी केले.

पुणे विभागात पदवीधर मतदारसंघासाठी 741 आणि शिक्षक मतदारसंघासाठी 310 मतदान केंद्रांवर मतदान होत आहे. पदवीधरच्या रिंगणात 47 उमेदवार आहेत, तर शिक्षक मतदारसंघात 30 उमेदवार उभे आहेत. दोन्ही मतदारसंघ मिळून विभागातील पाच जिल्ह्यांत 1 हजार 51 मतदान केंद्रे उभारण्यात आली आहेत. एकूण 4 लाख 49 हजार 959 मतदार आपला हक्क बजावणार आहेत.

शिक्षक मतदारसंघात शिंदे सेनेचे सचिन सानप, काँग्रेसचे जयंत आसगावकर आणि भाजपचे कौस्तुभ गावडे यांच्यात मुख्य लढत होण्याची शक्यता आहे. पदवीधर मतदारसंघात महायुतीच्या उमेदवार स्मिता जाधव यांच्यासमोर शरद पवार गटाच्या हर्षदा देशमुख-जाधव यांचे आव्हान आहे.

पदवीधर मतदारसंघात एकूण मतदार 3 लाख 88 हजार 19 असून केंद्रे 741 आहेत. पुण्यात 160 केंद्रे आणि 88 हजार 202 मतदार, साताऱ्यात 93 केंद्रे आणि 47 हजार 463 मतदार, सोलापुरात 117 केंद्रे आणि 49 हजार 72 मतदार आहेत. सांगलीत 159 केंद्रे आणि 88 हजार 70 मतदार, तर कोल्हापुरात सर्वाधिक 212 केंद्रे आणि 1 लाख 14 हजार 562 मतदार आहेत.

शिक्षक मतदारसंघात एकूण 61 हजार 940 मतदार आणि 310 केंद्रे आहेत. पुण्यात 72 केंद्रे आणि 16 हजार 822 मतदार, सोलापुरात 76 केंद्रे आणि 15 हजार 303 मतदार, साताऱ्यात 44 केंद्रे आणि 9 हजार 454 मतदार आहेत. सांगलीत 48 केंद्रे आणि 8 हजार 62 मतदार, तर कोल्हापुरात 70 केंद्रे आणि 12 हजार 299 मतदार आहेत.