राहुल गांधींच्या आंदोलनात नवी फळी; वेणुगोपाल, प्रणिती शिंदे, देवेंद्र यादव पुढे

नवी दिल्ली : राहुल गांधी यांच्या नेतृत्वाखाली काँग्रेसमध्ये एक नवी आणि आक्रमक टीम पुढे आली आहे. मुख्य निवडणूक आयुक्त ज्ञानेश कुमार यांना हटवावे, या मागणीसाठी गेले काही दिवस आंदोलन सुरू आहे आणि त्यात ही टीम आघाडीवर आहे. संसद, रस्ते आणि पोलीस स्टेशन अशा सर्व ठिकाणी ही मंडळी राहुल गांधी यांच्या खांद्याला खांदा लावून उभी आहेत. या टीममधील सर्वांत प्रमुख नाव म्हणजे संघटन महासचिव के. सी. वेणुगोपाल.

वेणुगोपाल हे संपूर्ण आंदोलनाचे रणनीतिकार म्हणून काम पाहत आहेत. दुपारच्या जेवणाच्या बैठकांपासून राजघाट मोर्चापर्यंतच्या नियोजनावर त्यांचे लक्ष असते आणि रोजच्या आंदोलनाची दिशाही तेच ठरवतात. त्यांच्या पाठोपाठ राज्यसभा खासदार आणि काँग्रेसच्या अल्पसंख्याक व्यवहार समितीचे अध्यक्ष इम्रान प्रतापगढी हे आंदोलनाचा आवाज बनले आहेत. ते रोज आंदोलनस्थळी सर्वांत आधी पोहोचतात, कार्यकर्त्यांमध्ये उत्साह भरतात आणि व्यासपीठाची सूत्रे हाती घेतात.

प्रसारमाध्यमे आणि पक्षाची बाजू मांडण्याच्या आघाडीवर काँग्रेसचे संचार प्रमुख पवन खेरा, ज्येष्ठ नेते जयराम रमेश, मणिकम टागोर, राजीव शुक्ला आणि दीपेंद्र हुडा आहेत. पोलिसांच्या एफआयआरला आणि भाजपच्या आरोपांना उत्तर देणे, पत्रकार परिषदा घेणे आणि टीव्हीवरील चर्चांमध्ये भाग घेणे, यातून हे नेते सातत्याने पक्षाची भूमिका मांडत आहेत आणि सरकारला कोंडीत पकडत आहेत.

दिल्ली प्रदेश काँग्रेसचे अध्यक्ष देवेंद्र यादव यांनीही या आंदोलनात महत्त्वाची भूमिका बजावली आहे. कनॉट प्लेस आणि राजघाट येथे हजारो लोक जमले, त्यामागे त्यांची टीम असल्याचे मानले जाते. तरुण आणि महिलांमध्ये सोलापूरच्या खासदार प्रणिती शिंदे या आंदोलनाचा नवा चेहरा म्हणून पुढे आल्या आहेत. संसदेत मतचोरीच्या मुद्द्यावर त्यांनी केलेले भाषण आणि महिला कार्यकर्त्यांसोबत रस्त्यावरची त्यांची उपस्थिती, याचा तरुणांवर मोठा प्रभाव पडला असून त्यामुळे त्यांना प्रचंड लोकप्रियता मिळाली आहे.

या नव्या टीमचा उदय एका मोठ्या राजकीय फेरबदलातूनही झाला आहे. राहुल गांधी यांच्या आक्रमक आणि वैचारिक राजकारणाशी जुळवून घेता न आलेल्या काँग्रेसच्या अनेक ज्येष्ठ नेत्यांनी आता स्वतःला पक्षापासून दूर केले आहे. त्यांच्यापैकी सर्वांत प्रमुख म्हणजे गुलाम नबी आझाद. ते एकेकाळी सोनिया गांधी यांच्या जवळचे होते, पण जी-२३ नंतर त्यांनी पक्ष सोडला. तसेच जितीन प्रसाद, आरपीएन सिंग आणि आता भाजपमध्ये असलेले ज्योतिरादित्य शिंदे हे राहुल यांच्या 'रस्त्यावरील लढाई' या मॉडेलमुळे अस्वस्थ होते.

या नव्या कोअर टीममध्ये कॅमेऱ्यासमोर कमी दिसणारे, पण पडद्यामागे अधिक सक्रिय असलेले अनेक चेहरे आहेत. त्यात मीडिया टीमचीही भूमिका आहे. विनीत पुनिया, संजीव सिंग, मनोज त्यागी, सुप्रिया भारद्वाज, प्रमोद रावत, प्रखर सिंग, अरुण त्रिपाठी, नितीन सारस्वत, विवेक सिंग, गिरीश कुमार आणि रचना कपूर यांच्यासारखे लोक आंदोलनाला धार देण्यासाठी काम करत आहेत.