नागपूर पदवीधर: कोहळेंची हजारो मते 2 अंक लिहिल्याने अवैध, वंजारी 3271 मतांनी विजयी

नागपूर विभाग पदवीधर मतदारसंघाच्या निवडणुकीत भाजपचा सलग दुसऱ्यांदा पराभव झाला आहे. काँग्रेसचे उमेदवार आणि विद्यमान आमदार अभिजीत वंजारी यांनी भाजपचे सुधाकर कोहळे यांना 3271 मतांनी हरवले. पण निकालानंतर वेगळीच चर्चा रंगली आहे, ती अवैध ठरलेल्या मतांची.

सुमारे सहा ते सात हजार मतदारांनी कोहळे यांच्या नावासमोरच्या डब्यात 1 ऐवजी 2 हा अंक लिहिला. त्यामुळे या सगळ्या मतपत्रिका अवैध ठरल्या आणि अवैध मतांचा एकूण आकडा 15106 पर्यंत गेला. ज्यांनी 2 लिहिले, त्यांनी 1 लिहिले असते तर कोहळे यांना हजारो मते जास्त मिळू शकली असती. एवढ्या मोठ्या संख्येने मतदारांनी एकसारखीच चूक कशी आणि का केली, हा अपघात आहे की कोणी ठरवून केलेला घात आहे, असे प्रश्न आता विचारले जात आहेत. भाजप आणि कोहळे यांचा "करेक्ट कार्यक्रम" करण्याचे काही नियोजन होते का, अशीही चर्चा आहे. या निवडणुकीत निवडणूक आयोगाने नोटाचा पर्याय दिलेला नसताना मतदारांनी 2 अंक लिहून एका प्रकारे नोटाच करून घेतला का, असाही प्रश्न विचारला जात आहे.

संघाचे ज्येष्ठ स्वयंसेवक आणि माजी भाजप कार्यकर्ते रवी वाघमारे यांनीही याच विषयावर आपले मत मांडले. एवढ्या मोठ्या संख्येने मतदारांनी एकाच पद्धतीने आपले मत अवैध करणे हा अपघात नसून घातपात आहे, अशी शंका त्यांनी व्यक्त केली. भाजप श्रेष्ठींनी याकडे लक्ष द्यावे, अशी सूचनाही त्यांनी केली.

वाघमारे यांच्या म्हणण्यानुसार, मतपत्रिकेवर 1 हा क्रमांक लिहिल्याशिवाय मत वैध ठरत नाही, हे जाणणाऱ्या सुज्ञ मतदारांनीच हे जाणूनबुजून केले आहे. या निवडणुकीत नोटा हा पर्याय नसल्यामुळे अनेकांनी 1 न लिहिता 2 लिहून स्वतःचे मत नोटासारखे करून घेतले, असे ते म्हणाले. भाजपच्या हजारो मतदारांनी असे का केले, याचा विचार भाजप श्रेष्ठींनी करायला हवा, असेही त्यांनी सांगितले.

अपक्ष उमेदवार नितेश कराळे यांना भाजपला अनुकूल असलेल्या नागपूरमधील अनेक वस्त्यांमध्ये पहिल्या आणि दुसऱ्या पसंतीची मते मोठ्या प्रमाणात मिळाली, याकडेही वाघमारे यांनी लक्ष वेधले. कराळे यांच्याकडे कोणतीही यंत्रणा नसताना त्या तरुणाने एवढे मतदान कसे आणि कोणाचे मिळवले, हा विचार करण्यासारखा मुद्दा आहे, असे ते म्हणाले. भाजप नेतृत्वाने याचे आत्मपरीक्षण करण्याची गरज आहे, अशी सूचना त्यांनी केली. कराळे यांना मिळालेल्या मतांवरून "जेन झी" ला दुर्लक्षित ठेवून चालणार नाही हे दिसले, असेही वाघमारे यांनी म्हटले.

जातीच्या मुद्द्यावरही वाघमारे यांनी भाष्य केले. पदवीधर मतदारसंघाची निवडणूक जातीवर जाणे दुर्दैवी आहे, असे सांगून ते म्हणाले की संदीप जोशी यांच्या वेळी निवडणूक जातीवर गेली होती. तो अनुभव लक्षात घेऊन यंदा निवडणूक जातीवर जाऊ नये म्हणून भाजपने कुणबी समाजाचे सुधाकर कोहळे यांना उमेदवारी दिली, पण भाजप श्रेष्ठींचे हे गणित पूर्णपणे चुकल्याचे दिसून आले, असे वाघमारे यांचे म्हणणे आहे.