पहिल्या फेरीत 40 ते 45 हजार मते मिळणार, नागपूर पदवीधर मतदारसंघात नितेश कराळे गुरुजींचा विजयाचा दावा

नागपूर पदवीधर मतदारसंघाच्या निवडणुकीतील अपक्ष उमेदवार नितेश कराळे गुरुजी यांनी आपल्या विजयाचा ठाम विश्वास व्यक्त केला आहे. मतमोजणीच्या पहिल्या फेरीतच आपल्याला 40 ते 45 हजार मते मिळतील आणि त्यानंतर मोठ्या मतांनी आपला विजय होईल, असे त्यांनी सांगितले.

या निवडणुकीच्या मतमोजणी प्रक्रियेत पहिल्या फेरीत 84 हजार मते मोजली जाणार आहेत. त्यापैकी 40 ते 45 हजार मते एकट्या कराळे गुरुजींना मिळाल्याचा दावा त्यांनी केला आहे. म्हणजेच जवळपास 50 टक्के मतदारांचा कौल आपल्या बाजूला असेल, असा दावा करत त्यांनी आपल्या विजयाचा विश्वास दाखवला आहे.

सेकंड नंबरची मते आपल्या विजयी घोडदौडीत आणू शकतो, अशी अपेक्षाही कराळे गुरुजींनी व्यक्त केली आहे. एवढेच नाही, तर अनपेक्षित असा निकाल लागण्याची शक्यताही त्यांनी बोलून दाखवली आहे.

आपल्या विजयामागचे कारण सांगताना कराळे यांनी भाजप आणि काँग्रेस या दोन्ही पक्षांकडे बोट दाखवले. ते म्हणाले, लोकांमध्ये भाजपविरोधात रोष आहे. कारण भाजपचा आमदार निवडून दिला, तर तो देवाभाऊंच्या विरोधात जाऊन आमचे प्रश्न विचारू शकत नाही, हे खुद्द बीजेपीच्या (BJP) लोकांनीही बोलून दाखवले आहे.

काँग्रेसबद्दल बोलताना कराळे म्हणाले की, काँग्रेसचा (Congress) उमेदवार सहा वर्षे आमदार होता, पण त्यांनी विद्यार्थ्यांचा एकही प्रश्न विचारला नाही. एक कवडीचा निवाड पाडला नाही. त्यामुळे पहिल्या फेरीत 40 ते 45 हजार मते मला मिळतील आणि माझा मोठ्या मतांनी विजय होईल, असा विश्वास त्यांनी व्यक्त केला.

या मतदारसंघात भाजप आणि काँग्रेस यांच्यात चुरशीची लढत आहे. अशा वेळी कोणत्याही पक्षाचे उमेदवार नसलेल्या नितेश कराळे यांचा डाव गेमचेंजर ठरणार का, असा प्रश्न विचारला जात आहे. पहिल्या फेरीतील 84 हजार मतांपैकी निम्म्याच्या जवळपास मते आपल्याला मिळतील, हा त्यांचा दावा आहे.

प्रत्येक उमेदवार आपापल्या विजयाचा दावा करत असला, तरी कोणाचा दावा खरा ठरणार, हे निकालाअंती स्पष्ट होणार आहे. तोपर्यंत नागपूरच्या पदवीधर मतदारांचा कौल कोणाच्या बाजूने जातो, याकडे सर्वांचे लक्ष लागले आहे.