नागपूर पदवीधर: अभिजीत वंजारी 3271 मतांनी विजयी, सुधाकर कोहळेंचा पराभव

नागपूर पदवीधर मतदारसंघाच्या चुरशीच्या निवडणुकीत काँग्रेसचे अभिजीत वंजारी यांनी भाजपचे सुधाकर कोहळे यांचा पराभव केला. वंजारी यांचा विजय 3271 मतांनी झाल्याची अधिकृत घोषणा बुधवारी रात्री उशिरा करण्यात आली.

मंगळवारी सकाळी आठ वाजता मतमोजणी सुरू झाली आणि ती तब्बल 45 तास चालली. पहिल्या टप्प्यात, म्हणजे मंगळवारी, काँग्रेसचे अभिजीत वंजारी आघाडीवर होते. बुधवारी पहाटेपर्यंत दुसरी फेरी पूर्ण झाल्यावर मात्र भाजपचे सुधाकर कोहळे यांनी सुमारे चार हजार मतांची आघाडी घेतली होती आणि ते बराच काळ ती टिकवून होते. बुधवारी संध्याकाळनंतर चित्र अचानक पालटले आणि दुसऱ्या पसंतीच्या मतांच्या जोरावर वंजारी यांनी कोहळे यांना मागे टाकले.

अंतिम आकडेवारीनुसार अभिजीत वंजारी यांना पहिल्या आणि दुसऱ्या पसंतीक्रमाची मिळून एकूण 67 हजार 231 मते मिळाली. त्यांचे प्रतिस्पर्धी, भारतीय जनता पार्टीचे (BJP) सुधाकर कोहळे यांना 63 हजार 960 मते पडली. अपक्ष उमेदवार नितेश कराळे यांना एकूण 25 हजार 909 मते मिळाली.

नागपूरमधील हा पराभव भाजपसाठी मोठा धक्का मानला जात आहे. या निवडणुकीत भाजपचे दोन अंदाज चुकल्याची माहिती समोर आली आहे, त्यापैकी एक अंदाज काही प्रमाणात खरा ठरला. भाजपच्या प्राथमिक सर्वेक्षणात अपक्ष उमेदवार नितेश कराळे यांना सुमारे 15 हजार मते मिळतील, असा अंदाज होता. प्रत्यक्षात कराळे यांनी त्यापेक्षा सरस कामगिरी केली आणि 25 हजार 909 मते घेतली. कराळे यांना एवढी मते मिळणे अनाकलनीय असल्याचे सुधाकर कोहळे यांनी बोलूनही दाखवले.

दुसऱ्या पसंतीच्या मतांच्या आधारे निकाल लावायचा झाल्यास कोणाला फायदा होईल, याचे आकलन कोणत्याच राजकीय पक्षाला नव्हते. हीच गोष्ट निर्णायक ठरली. पहिल्या दोन फेऱ्यांनंतर कोहळे आघाडीवर होते. बुधवारी संध्याकाळी कराळे यांच्या दुसऱ्या पसंतीच्या मतांची मोजणी सुरू झाल्यानंतर संपूर्ण चित्र बदलले. कराळे यांची दुसऱ्या पसंतीची बहुतांश मते वंजारी यांना मिळाली. त्यामुळे 4000 मतांनी पिछाडीवर असलेले वंजारी एक-दोन तासांतच आघाडीवर आले आणि शेवटी 3271 मतांनी जिंकले.

काँग्रेसचा अंदाज मात्र या निवडणुकीत तंतोतंत खरा ठरल्याचे दिसत आहे. नागपूरमध्ये या निवडणुकीसाठी 60 टक्के मतदान झाले होते, तर चंद्रपूर, गोंदिया आणि गडचिरोली भागात 71 टक्क्यांपेक्षा जास्त मतदान झाले होते. या भागात काँग्रेसचे वर्चस्व असल्याने याच मतदानाच्या जोरावर पदवीधरच्या निवडणुकीत आपल्याला विजय मिळू शकतो, असा विश्वास काँग्रेसला वाटत होता.

वंजारी यांच्या विजयात कराळे यांच्या दुसऱ्या पसंतीच्या मतांचा मोठा वाटा असला, तरी पहिल्या फेरीतही वंजारी यांना पहिल्या पसंतीची मते मोठ्या प्रमाणावर मिळाली होती. त्या फेरीत त्यांनी आघाडीही घेतली होती.