नागपूर पदवीधर निवडणूक: 15 हजार 106 मते अवैध, कोहळेंच्या नावासमोर 2 आकडा लिहिल्याने सुमारे तीन हजार मते बाद

नागपूर विभाग पदवीधर मतदारसंघाच्या निवडणुकीत एकूण 1 लाख 65 हजार 541 मतदान झाले. त्यापैकी तब्बल 15 हजार 106 मते अवैध ठरली आहेत. पदवीधरांच्या निवडणुकीत एवढ्या मोठ्या प्रमाणावर मते अवैध ठरणे लक्षवेधी ठरले आहे.

त्याहूनही लक्षवेधी बाब म्हणजे भाजपचे उमेदवार सुधाकर कोहळे (Sudhakar Kohale) यांच्या नावासमोर अनेक मतदारांनी मतपत्रिकेवर फक्त 2 हा आकडा लिहिला. पहिल्या पसंतीसाठी त्यांच्या नावासमोर 1 लिहिणे अपेक्षित असते. मिळालेल्या माहितीप्रमाणे, अशा मतपत्रिकांमुळे सुमारे तीन हजार मते अवैध ठरली आहेत. कोहळे यांना मिळू शकणारे हक्काचे मतदान त्यामुळे बाद झाले. हे मतदान त्यांना मिळाले असते, तर त्यांची आघाडी वाढली असती.

एवढ्या मोठ्या संख्येने मतदारांनी कोहळे यांच्या नावासमोर 1 ऐवजी 2 लिहिल्याने त्यांच्या आघाडीला फटका बसलाच, शिवाय ही कृती विशिष्ट मतदारांच्या गटाने ठरवून केली आहे का, असा प्रश्नही उपस्थित झाला आहे.

नागपूर पदवीधर मतदारसंघातील मतमोजणीच्या दोन्ही फेऱ्यांनंतर 1 लाख 50 हजार 874 मते वैध ठरली. नियमाप्रमाणे त्यामुळे विजयासाठी 75 हजार 438 मतांचा कोटा ठरला आहे. दोन्ही प्रमुख उमेदवारांपैकी कोणालाही एवढी मते मिळवता आली नाहीत. म्हणून आता बाद फेरी सुरू झाली असून दुसऱ्या पसंतीची मते मोजायला सुरुवात झाली आहे.

सध्याच्या स्थितीत पहिल्या आणि दुसऱ्या पसंतीची मते मिळून सुधाकर कोहळे यांना 60,945 मते आहेत, तर अभिजीत वंजारी यांना 56,665 मते मिळाली आहेत. कोहळे सध्या 4280 मतांनी पुढे आहेत. तळाचे उमेदवार एकामागून एक बाद केले जात आहेत आणि आतापर्यंत 16 उमेदवार बाद झाले आहेत. या उमेदवारांच्या मतांमध्ये वंजारी यांना कोहळे यांच्यापेक्षा थोडी जास्त मते मिळाली, पण त्यामुळे कोहळे यांची एकूण आघाडी फारशी कमी झालेली नाही. 16 उमेदवार बाद झाल्यानंतरही कोहळे यांची आघाडी 4280 मतांचीच आहे.

तिसऱ्या क्रमांकावर असलेले नितेश कराळे यांच्या मतांमधील दुसऱ्या पसंतीच्या मतांवर या निवडणुकीचा निकाल अवलंबून आहे. थोड्या वेळाने कराळे यांच्या 24 हजार 249 मतांमधील दुसऱ्या पसंतीची मते मोजायला सुरुवात होईल. ही मते अभिजीत वंजारी यांना जास्त मिळतात की सुधाकर कोहळे यांना, यावरच नागपूर पदवीधर मतदारसंघाचा निकाल ठरणार आहे. कराळे यांच्या मतांमधील दुसऱ्या पसंतीची मते कोणाला बळ देतात, यावर भाजप आणि काँग्रेसचे भवितव्य निश्चित होईल.