नागपूर पदवीधर मतदारसंघात वंजारी आणि कोहळे यांच्यात अटीतटीची लढत, दुसऱ्या फेरीअखेर कोहळे आघाडीवर

विधान परिषदेच्या तीन पदवीधर आणि दोन शिक्षक मतदारसंघांतील मतमोजणीत कल बदलत गेले आहेत. छत्रपती संभाजीनगर येथील मराठवाडा पदवीधर मतदारसंघापासून पुण्यापर्यंत महाविकास आघाडी धक्का देण्याच्या तयारीत असल्याचे चित्र आहे. मुख्यमंत्र्यांचा बालेकिल्ला मानल्या जाणाऱ्या नागपूर पदवीधर मतदारसंघातही काँग्रेस आणि महाविकास आघाडीने जोरदार टक्कर दिली आहे.

या मतदारसंघात काँग्रेसचे उमेदवार अभिजीत वंजारी आणि भाजपचे उमेदवार सुधाकर कोहळे यांच्यात अटीतटीची लढत दिसून आली. रात्री उशिरापर्यंत चाललेल्या मतमोजणीत कधी एकजण पुढे, तर कधी दुसरा, असा खेळ सुरू होता. म्हणजेच कोणाचे पारडे जड आहे, हे ठामपणे सांगता येईल अशी स्थिती त्या वेळी नव्हती.

मतमोजणीनंतर एकूण 1 लाख 50 हजार 874 मते वैध ठरली. त्यानुसार विजयासाठी 75 हजार 438 मतांचा कोटा ठरला होता. पहिल्या फेरीत दोन्हीपैकी कोणत्याही उमेदवाराला हा कोटा गाठता आला नाही. त्यामुळे दुसऱ्या पसंतीक्रमाच्या मतांची मोजणी सुरू झाली.

अवैध ठरलेल्या मतांची फेरमोजणी करावी, अशी मागणी भाजपचे उमेदवार सुधाकर कोहळे यांनी केली. दुसऱ्या फेरीत कोहळे यांना दोन ते अडीच हजार मतांची आघाडी मिळेल, असा अंदाज वर्तवला जात होता. एलिमिनेशनमध्ये काँग्रेसचे अभिजीत वंजारी पुढे जाणार का, याकडे सर्वांचे लक्ष लागले होते. प्रत्यक्षात दुसऱ्या फेरीत सुधाकर कोहळे यांनी आघाडी घेतली.

नागपूर विभाग पदवीधर मतदारसंघ निवडणुकीत दुसऱ्या फेरीअखेर मिळालेली मते अशी: अभिजीत वंजारी यांना 56651, सुधाकर कोहळे यांना 60935 आणि नितेश कराडे यांना 23985. या फेरीअखेर भाजपचे सुधाकर कोहळे 4284 मतांनी आघाडीवर होते. अवैध मतांची संख्या 15106 आहे.

मतमोजणी सुरू असताना एक वेगळे चित्रही दिसले. काँग्रेसचे उमेदवार अभिजीत वंजारी मतमोजणी केंद्रावर पोहोचले, तेव्हा भाजप आमदार प्रवीण दटके यांनी त्यांना आवाज दिला आणि दोघांनी गळाभेट घेतली. त्या वेळी भाजप आणि काँग्रेसचे कार्यकर्ते तिथे उपस्थित होते. हे चित्र पाहून अनेकांनी आनंद व्यक्त केला.

दुसरीकडे, नागपुरातील मानकापूर स्टेडियम येथील मतमोजणी केंद्राबाहेरच्या मुख्य रस्त्यावर भाजप आणि काँग्रेसचे काही कार्यकर्ते जमले होते. दोन्ही बाजूंनी घोषणाबाजी झाली आणि काही काळ तणाव निर्माण झाला. नंतर पोलीसांनी दोन्ही पक्षांच्या कार्यकर्त्यांना तिथून हटवले.