जरांगेंच्या ५०० कोटींच्या दाव्यावरून महायुतीत जुंपली, श्रीकांत शिंदे अजूनही गप्प

मनोज जरांगे पाटील यांनी एक ऑडिओ क्लिप जाहीर केली आणि महाराष्ट्राच्या राजकारणात एकदम गदारोळ सुरू झाला. या क्लिपमध्ये भाजपशी संबंधित लोकांची नावं येतात. त्यातली एक व्यक्ती श्रीकांत शिंदे यांच्या माध्यमातून जरांगे यांना ५०० कोटी रुपये दिले गेल्याचं सांगताना ऐकू येते, असा दावा आहे. क्लिप समोर आल्यावर जरांगे यांनी थेट एकनाथ शिंदे यांना याबद्दल उत्तर मागितलं.

त्यानंतर रामदास कदम यांच्यासह शिंदे गटाचे नेते भलतेच आक्रमक झाले आहेत. ही क्लिप बाहेर येण्यामागे भाजपचा अप्रत्यक्ष हात असावा, असा इशारा कदम यांनी दिला. भाजपचे नेते शिंदे यांचा केसाने गळा कापायला निघाले आहेत, एका केसच्या मार्फत त्यांना अडकवायचा प्रयत्न सुरू आहे, असा खळबळजनक आरोपही कदम यांनी केला. दुसरीकडे जरांगे पाटील रोज पत्रकार परिषद घेत आहेत, त्यामुळे शिवसेना आणि भाजपमधलं वातावरण आणखीनच तापत चाललं आहे.

कदम यांच्या आरोपांना भाजपनेही लगेच उत्तर दिलं. शुक्रवारी आमदार प्रवीण दरेकर यांनी पत्रकार परिषद घेतली. कदम यांच्यासारख्या जबाबदार नेत्याने असं बेजबाबदार बोलणं बरोबर नाही, असं ते म्हणाले. पडद्यामागे राहून जरांगे यांना बळ देणारे आणखी कोण होते आणि देवेंद्र फडणवीस यांना बदनाम करण्यासाठी कोण कोण सरसावलं होतं, तेही लवकरच बाहेर येईल, असं दरेकर यांनी सांगितलं. भाजपवर आरोप केले तर जशास तसं उत्तर मिळेल, असा सज्जड दमही त्यांनी दिला. भाजपला बदनाम करायचा हा काही ठरवून आखलेला डाव आहे का, असा सवालही त्यांनी विचारला. रामदास भाई, उदय सामंत आणि प्रताप सरनाईक हे सगळे एकाच सुरात बोलतात, याकडेही त्यांनी लक्ष वेधलं.

भाजपचे आमदार प्रसाद लाड यांनीही कदम यांना सुनावलं. तुम्ही एकनाथ शिंदे आणि त्यांच्या मुलाबद्दल काय बोलता, ते जर आम्ही चव्हाट्यावर आणलं, तर तुम्हालाच जड जाईल, असं लाड म्हणाले.

या सगळ्या आरोप-प्रत्यारोपांमुळे शिवसेना आणि भाजपमध्ये ठिणगी पडली आहे. दोन्ही पक्ष एकमेकांवर आरोप करत आहेत आणि एकमेकांवर कुरघोडी करायचाही प्रयत्न करत आहेत, असं चित्र दिसतंय. गेल्या दोन दिवसांत महायुतीतला तणाव चांगलाच वाढला आहे.

एवढं सगळं होत असतानाही खासदार श्रीकांत शिंदे मात्र गप्प आहेत. ज्यांच्या माध्यमातून ५०० कोटी दिल्याचा दावा केला जातोय, तेच या प्रकरणातला मुख्य दुवा आहेत. तरीही त्यांनी एकदाही समोर येऊन आपली बाजू मांडलेली नाही. ते जरांगे यांच्या ५०० कोटींच्या आरोपावर कधी बोलणार, याकडे राजकीय वर्तुळाचं लक्ष लागलं आहे. राजकीय तापमान वाढत असताना त्यांच्या या शांततेमुळे चर्चा आणखीनच रंगली आहे.

या क्लिपमुळे श्रीकांत शिंदे यांच्या प्रतिमेला धक्का बसला आहे. आपल्या सर्वोच्च नेत्यावर असे आरोप झाल्याने शिवसेनेचे नेतेही पेटून उठले आहेत. गेल्या काही वर्षांत एकनाथ शिंदे मराठा नेते म्हणून पुढे आले आहेत, आणि या प्रकरणामुळे त्यांचीही प्रतिमा डागाळली आहे, असं बोललं जातंय.