जरांगे यांचा शिंदेंवर 500 कोटींचा आरोप, चौथ्या ऑडिओ क्लिपमध्ये विखे पाटलांचे नाव

मराठा समाजाचे नेते मनोज जरांगे पाटील यांनी एक ऑडिओ क्लिप ऐकवली आणि राज्याच्या राजकारणात मोठी खळबळ उडाली. राज्याचे उपमुख्यमंत्री एकनाथ शिंदे यांनी माझ्या नावाने भाजपाकडून 500 कोटी रुपये घेतले, असा खळबळ उडवणारा दावा जरांगे यांनी केला आहे. हे सगळे श्रीकांत शिंदे यांच्या मार्फत झाले, असेही त्यांनी म्हटले आहे.

या कथित ऑडिओ क्लिपमध्ये एक महिला शिंदे यांना 500 कोटी रुपये दिल्याचे बोलताना ऐकू येते, असे सांगितले जात आहे. हीच गोष्ट आता चर्चेचा मुख्य मुद्दा बनली आहे. विशेष म्हणजे ही क्लिप मीडियासमोर सादर करण्यापूर्वीच व्हायरल झाली होती. त्यामुळे ती सादर होण्याआधीच लोकांमध्ये तिची चर्चा सुरू झाली होती.

दुसरीकडे ही ऑडिओ क्लिप AI च्या मदतीने बनवल्याचेही सांगितले जात आहे. त्यामुळे आरोप आणि प्रत्यारोप सुरू आहेत. मराठा समाजाला न्याय मिळवून देण्यात एकनाथ शिंदे यांचे योगदान मोठे आहे, असे विधान शिवसेनेच्या नेत्यांकडून केले जात आहे. म्हणजेच एकीकडे जरांगे यांचा आरोप आहे, तर दुसरीकडे शिवसेनेचे नेते शिंदे यांच्या कामाची बाजू मांडत आहेत.

या ऑडिओ क्लिपच्या तपासणीसाठी SIT स्थापन केली पाहिजे, असे नवनाथ बन यांनी म्हटले आहे. आज प्रत्येक जण या क्लिपची चौकशी झाली पाहिजे, अशीच मागणी करताना दिसत आहे.

क्लिपमध्ये काही लोक एकमेकांशी बोलताना दिसत आहेत. त्यात राज्यातील काही बड्या नेत्यांच्या नावांचा उल्लेख करण्यात आला आहे. त्यापैकी एक नाव मंत्री राधाकृष्ण विखे पाटील यांचे आहे. त्यांचे नावही थेटपणे या क्लिपमध्ये घेण्यात आले आहे. ही जरांगे यांनी ऐकवलेली चौथी ऑडिओ क्लिप आहे.

क्लिपमधील संवादात लव्ह जिहादचा विषयही आहे. त्यात असे म्हटले आहे की, ना विखे यांनी मत व्यक्त केले, ना संभाजीनगरमधील मराठा समाजाने मत व्यक्त केले. एका मुस्लीम महिलेला बँक कर्मचाऱ्याने दुसऱ्या ब्रॅचमध्ये नेऊन सोडले, म्हणून संभाजीनगरमध्ये त्याला तूफान धुतले गेले. याआधी तो बोलत होता म्हणून त्याला मैदानावर मारले होते. हे सर्व घडत असताना संभाजीनगरमधून एकालाही साधा निषेध करावा वाटला नाही, असेही त्यात म्हटले आहे.

मराठा समाजाचे ओबीसीकरण करा, यावरही या क्लिपमध्ये संवाद झाला आहे. जागतिक पातळीवरची चर्चाही त्या क्लिपमध्ये झाल्याचे दिसत आहे. जरांगे यांनी ऐकवलेल्या या क्लिपमुळे राज्याच्या राजकारणात मोठी खळबळ उडाली आहे आणि पुढे काय होणार, याकडे सगळ्यांचे लक्ष लागले आहे.