ऑडिओ क्लीप 'सामना'च्या स्टुडिओत बनली, राऊतांना पोलिसांनी उचलावे, भाजप आमदार लाड यांची मागणी

गेले काही दिवस महाराष्ट्राच्या राजकारणात भाजपच्या अंतर्गत वर्तुळातील एका ऑडिओ क्लीपमुळे मोठी खळबळ उडाली आहे. ही क्लीप संजय राऊत यांनीच तयार करवून घेतली, असा थेट आरोप भाजपचे आमदार प्रसाद लाड यांनी केला आहे. दैनिक 'सामना'च्या कार्यालयातील स्टुडिओत ही बनावट क्लीप तयार झाली, असे त्यांचे म्हणणे आहे.

त्यामुळे पोलिसांनी संजय राऊत यांना उचलून त्यांची चौकशी केली पाहिजे, अशी मागणी लाड यांनी केली. एवढेच नाही, तर 'सामना'च्या स्टुडिओत जाऊन या सगळ्या प्रकाराची चौकशी झाली पाहिजे, असेही ते म्हणाले. या वक्तव्यावरून आता ठाकरे गट आक्रमक होण्याची शक्यता आहे.

शिवसेना आणि भाजप यांच्यात भांडण लावायचे काम कोण करत आहे, याचीही पोलिसांच्या एसआयटीने चौकशी करावी, असे लाड यांनी सांगितले. संजय राऊत यांच्यावर गुन्हा दाखल करून आधी त्यांना उचलले पाहिजे, असे ते म्हणाले. क्लीपमधील 500 कोटींच्या दाव्याचे आम्ही कधीच खंडन केलेले नाही, असे सांगत त्यांनी त्याची तपासणी केली जाईल आणि त्यासाठी क्लीपची फॉरेन्सिक टेस्ट होईल, असेही स्पष्ट केले. मात्र या क्लीपचा निर्माता संजय राऊतच आहेत, असा त्यांचा दावा आहे.

राऊत यांनी भाजपच्या विधान परिषदेच्या आमदाराने ही क्लीप मनोज जरांगे यांना दिली, असे म्हटले होते. अशा आरोपांनी मला काहीच फरक पडत नाही, असे लाड यांनी सांगितले. चौकशी होईपर्यंत धीर धरला पाहिजे, असे मला वाटते, असेही ते म्हणाले. पण राऊत यांच्या बोलण्यामुळे भाजप आणि शिवसेनेत भांडण लावायचे षडयंत्र उघड झाले आहे, असा त्यांचा आरोप आहे.

आमच्यात कुठेही वाद होणार नाही, आम्ही एकनाथ शिंदे यांचा सन्मान करतो, असे लाड यांनी सांगितले. क्लीपमध्ये जे काही आहे ते चुकीचे आहे, पण या सगळ्याचा कर्ता करविता संजय राऊत आहेत, असे ते म्हणाले. हे सगळे कुठे केले गेले, 'सामना'च्या स्टुडिओत केले का, आणि मनोज जरांगे यांना ती क्लीप कोणी दिली, याची चौकशी झाली पाहिजे, असा मुद्दा त्यांनी मांडला. पोलिसांनी त्यांना चौकशीला बोलावले पाहिजे, असाही दावा लाड यांनी केला.

चौकशी होते तेव्हा काय होते, हे राऊत यांना माहिती आहे, मग 'पिसिंग अँड पिसिंग', 100 दिवस आत जावे लागते, असेही लाड म्हणाले. राऊत यांनीच ही क्लीप तयार केली, त्यासाठी सगळी मांडणी आणि स्क्रिप्ट त्यांनी लिहिली आणि त्यानंतर एआयच्या माध्यमातून व्हॉईस ओव्हर करण्यात आले, असे लाड यांनी म्हटले.

दुसरीकडे, टेप कोणी फोडली हा महत्त्वाचा मुद्दा आहे, असे संजय राऊत यांनी आधी म्हटले होते. ती ऑडिओ टेप भाजपच्या विधान परिषदेच्या आमदारानेच फोडली, असे ते म्हणाले होते. मनोज जरांगे पाटील यांच्या उपोषणाच्या वेळी हा आमदार त्यांच्यासोबत चर्चेसाठी असायचा, असे राऊत यांनी सांगितले होते. हा आमदार कोण आहे, हे मुख्यमंत्री देवेंद्र फडणवीस यांना माहिती आहे, असेही त्यांनी म्हटले होते. क्लीपमध्ये ज्यांचे संभाषण सुरू आहे, ती भाजप आणि देवेंद्र फडणवीस यांची कोअर टीम आहे, असा दावाही राऊत यांनी केला होता.