चर्चगेट ते विरार जमिनीखालून लोकल धावणार? भूमिगत रेल्वे नेटवर्कचा प्रस्ताव

देशाची आर्थिक राजधानी असलेल्या मुंबईत आणखी एक महत्त्वाकांक्षी प्रकल्प राबवण्याची तयारी सुरू होऊ शकते. लोकल प्रवाशांना यामुळे मोठा दिलासा मिळणार आहे. पश्चिम मार्गावर चर्चगेट ते विरार दरम्यान जमिनीखालून धावणारे उपनगरीय रेल्वे नेटवर्क उभारण्याचा प्रस्ताव देण्यात आला आहे. सध्या हा प्रस्ताव प्राथमिक टप्प्यावर आहे. रेल्वे बोर्डाने निधी मंजूर केला, तर हा मार्ग लवकरच अस्तित्वात येईल.

मुंबईतील वाढत्या गर्दीला यामुळे एक मोठा पर्याय उपलब्ध होईल. सध्याच्या लोकलवर जो ताण येतो, तो यामुळे कमी होईल, असे सांगण्यात आले आहे.

पश्चिम रेल्वेच्या वरिष्ठ अधिकाऱ्यांनी याबद्दल माहिती दिली आहे. त्यांच्या म्हणण्यानुसार, भूमिगत लोकल मार्ग उभारणे तांत्रिक आणि आर्थिक दृष्टीने किती आव्हानात्मक आहे आणि तो शक्य आहे की नाही, याची पाहणी आधी केली जाईल. बांधकाम विभागाला मंजूर निधी मिळाला, तर आधी प्रत्यक्ष पाहणी होईल आणि त्यानंतर अहवाल तयार केला जाईल.

या अभ्यासाचे परिणाम सकारात्मक आले आणि व्यावहारिक बाबी जुळून आल्या, तरच पुढच्या टप्प्यात सविस्तर प्रकल्प अहवाल तयार होईल. तो झाल्यानंतर प्रकल्पाला पुढे गती दिली जाईल.

पश्चिम रेल्वेवर सध्या रोज 1414 लोकल फेऱ्या होतात. प्रवाशांची संख्या सतत वाढत असल्यामुळे या सेवांवर ताण येत आहे. जमिनीखालून रेल्वेचे जाळे तयार केले, तर त्याचा मोठा फायदा होईल.

या योजनेत अत्याधुनिक स्टेशन्सचा विचार होणार आहे. स्टेशनमध्ये आत येण्याच्या आणि बाहेर पडण्याच्या मार्गिकांचाही विचार केला जाईल. प्रवाशांच्या सोयीच्या दृष्टीने या सुविधेचा वापर कसा होईल, हेही पाहिले जाणार आहे. याशिवाय मेट्रो स्टेशनच्या जवळची कनेक्टिव्हिटी आणि इतर बाबींचाही विचार करण्यात येणार आहे.

पश्चिम रेल्वेच्या अभ्यासासोबतच मुंबई रेल्वे विकास महामंडळाकडून स्वतंत्र अभ्यास केला जाणार आहे. एका आंतरराष्ट्रीय एजन्सीच्या माध्यमातून चर्चगेट ते विरार आणि छत्रपती शिवाजी महाराज टर्मिनस ते परळ अशा दोन महत्त्वाच्या कॉरिडोअरसाठी भूमिगत जोडणीचा अभ्यास होणार आहे.

सध्या हा प्रकल्प विचाराधीन आहे. सर्वेक्षण झाल्यानंतरच तो प्रत्यक्षात येईल की नाही, हे स्पष्ट होईल.