जरांगे पाटलांबद्दल आता बोलू नका, शिंदे यांची रामदास कदम यांना सूचना

मुंबई : मराठा आंदोलक मनोज जरांगे पाटील (Manoj Jarange) यांनी 500 कोटींच्या देवाण-घेवाणाची ऑडिओ क्लिप ऐकवली. त्यानंतर राजकीय वर्तुळात खळबळ उडाली आहे आणि महायुतीमध्येही तणावाचं वातावरण तयार झालं आहे. या वादात आता उपमुख्यमंत्री एकनाथ शिंदे (Eknath Shinde) यांनी शिवसेना नेते रामदास कदम यांना या विषयावर आणखी काही न बोलण्याची सूचना दिल्याची माहिती आहे.

रामदास कदम यांनी याआधी पत्रकार परिषद घेऊन थेट भाजप नेत्यांवर आरोप केले होते. आमदार प्रसाद लाड आणि मनोज जरांगे पाटील यांचा फोटो दाखवून ही मैत्री असल्याचं त्यांनी म्हटलं. भाजपकडून मित्रपक्षाला दाबलं जात असल्याचंही ते म्हणाले होते. त्यामुळे भाजप नेतेही नाराज झाले आहेत.

जरांगे पाटील यांनी क्लिप समोर आणल्यापासून भाजप आणि एकनाथ शिंदे यांची शिवसेना यांच्यात आरोप-प्रत्यारोप जोरात सुरू आहेत. मंत्री उदय सामंत यांनी दोन्ही बाजूंत समन्वय साधण्याचा प्रयत्न केला. तरीही या प्रकरणावरून वातावरण तापलेलंच असताना, या विषयावर आता बोलणं थांबवा, अशी भूमिका शिंदे यांनी घेतल्याचं सांगितलं जात आहे. त्यामुळे हा वाद संपवण्याचा शिंदे यांचा प्रयत्न आहे का, अशी चर्चा राजकीय वर्तुळात सुरू झाली आहे. जरांगे पाटील यांच्या क्लिपनंतर भाजप आणि शिंदे यांच्या शिवसेनेतील आरोप-प्रत्यारोपांवर आता पडदा पडतो का, हे पाहणं महत्त्वाचं ठरेल.

रामदास कदम पक्षात एकटे पडले का, असाही प्रश्न विचारला जात आहे. जरांगे पाटील यांच्या क्लिपवरून झालेल्या टीकेनंतर कदम भाजपच्या निशाण्यावर आले आहेत. पण पक्षातील नेते त्यांच्या पाठीशी दिसत नाहीत. भाजप आमदार प्रसाद लाड आणि प्रवीण दरेकर यांनी टीका केल्यानंतर मंत्री उदय सामंत यांना वगळता शिवसेनेतील एकाही नेत्याने भाजप आमदारांना उत्तर दिलं नाही.

रामदास कदम यांनी मोदींना पत्र लिहून मित्रपक्षाकडून होत असलेल्या कटाबद्दल नाराजी व्यक्त केली आहे. त्यानंतर पक्षातील नेत्यांनी मुख्यमंत्री देवेंद्र फडणवीस यांची भेट घेतली आणि जरांगे पाटील यांनी ऐकवलेल्या क्लिपची चौकशी करण्याची मागणी केली. मात्र कदम यांच्यावर भाजप आमदार करत असलेल्या टीकेला कोणीही उत्तर देत नाही. त्यामुळे भाजपला अंगावर घेणारे कदम पक्षातच एकटे पडल्याचं चित्र स्पष्ट दिसतं.

शिवसेनेतील अंतर्गत धुसफूस वाढत असल्याची चर्चा दबक्या आवाजात सुरू आहे. महायुतीच्या नेत्यांमधील समन्वय फक्त नावापुरता असून मुळात नेत्यांमध्ये मान-अपमानाची लढाई आहे, असं नेते खासगीत बोलतात. नुकत्याच झालेल्या विधानपरिषदेच्या निवडणुका हे त्याचं उत्तम उदाहरण असल्याचंही नेत्यांकडून सांगितलं जातं.