धुक्यामुळे मुंबईच्या किनाऱ्यावर नजर पोहोचेना, कोळी बांधवांना बोटी आणि जाळ्यांची चिंता

मुंबईत हवा खराब आहे, दृश्यमानता कमी आहे आणि AQI चे आकडेही चिंता वाढवणारे आहेत. या सगळ्यात शहरातील मच्छिमार समाजाला वेगळीच काळजी लागली आहे. धुक्यामुळे किनाऱ्याजवळ बोटी चालवणे अवघड होईल आणि बोटी तसेच जाळी धोक्यात येतील, असे त्यांना वाटते.

अखिल महाराष्ट्र मच्छिमार कृती समितीचे अध्यक्ष देवेंद्र तांडेल यांनी सांगितले की, प्रदूषण आणि धुक्याचा सर्वात जास्त परिणाम किनाऱ्याजवळच्या मासेमारीवर होतो. कफ परेड आणि वरळी भागातील मच्छिमार पहाटे चार वाजता समुद्रात जातात आणि सकाळी आठपर्यंत परत येतात. सूर्यप्रकाश आधीच मंद असताना धुके असले तर दिसणे आणखी कमी होते. जीपीएस नसलेल्या लहान बोटींना किनाऱ्यावरच्या खडकांवर आदळण्याचा धोका वाढतो, असे ते म्हणाले. अनेक बोटींवर जवळच्या बोटी आणि अडथळे ओळखणारी रडार यंत्रणाही नाही, त्यामुळे जाळी कुठेतरी अडकण्याची भीती असते, असेही तांडेल यांनी सांगितले.

गोराईचे मच्छिमार रॉनी कोलासो यांनी जुना अनुभव सांगितला. धुरकट हवेमुळे मोठ्या बोटी रस्ता चुकून भलतीकडे गेल्या आणि त्यांना आमची जाळी दिसली नाही, असे आधी घडले आहे. त्यामुळे जाळी फाटतात आणि आमचे नुकसान होते, असे ते म्हणाले. या आठवड्यात हवेची गुणवत्ता विशेषतः खराब आहे आणि वाढत्या उष्णतेचाही आरोग्यावर परिणाम झाला आहे, असेही कोलासो यांनी सांगितले.

कोळी समाजाचे नेते म्हणतात की धुके हे नेहमीच हंगामी असते, पण प्रदूषणामुळे कमी दृश्यमानतेचे तास वाढले आहेत. खार दांडा कोळीवाड्याचे अध्यक्ष रत्नदीप बामे यांच्या म्हणण्यानुसार, पूर्वी हिवाळ्यातले धुके पहाटेच्या सुमारास येऊन लवकर निघून जायचे. आता बांधकाम प्रकल्प आणि प्रदूषणामुळे ते सकाळी दहापर्यंत किंवा त्यानंतरही राहते, आणि संध्याकाळी लवकर दाटून येते. पाण्यातही अनेक प्रकल्पांची कामे सुरू आहेत. धुक्यामुळे किनाऱ्याजवळच्या मच्छिमारांना खांब आणि बांधकामाचे अडथळे नीट दिसत नाहीत, असे बामे यांनी सांगितले. किनाऱ्याजवळ गिलनेटने मासेमारी करणाऱ्यांना याचा फटका बसतो आणि जाळी अडकली तर त्यांची संपूर्ण पकड हातची जाऊ शकते, असेही ते म्हणाले.

गोराई व्हिलेजर्स वेल्फेअर असोसिएशनच्या अध्यक्षा स्विट्सी हेन्रिक्स यांनी सांगितले की, खराब हवेचा परिणाम लहान मुलांवरही होत आहे. या हवेत आजारी पडणाऱ्या मुलांची संख्या वाढताना दिसत आहे, गोराई मुंबईपासून दूर असले तरी प्रदूषित हवा तिथपर्यंत पोहोचली आहे, असे त्या म्हणाल्या.