जरांगेंना ऑडिओ क्लीप भाजपच्याच विधान परिषद आमदाराने दिली, संजय राऊत यांचा दावा

मनोज जरांगे यांनी काही दिवसांपूर्वी एक ऑडिओ क्लीप समोर आणली आणि महाराष्ट्राच्या राजकारणात खळबळ उडाली. ही क्लीप भाजपच्या अंतर्गत वर्तुळातील संभाषणाची आहे. मग ती जरांगे यांच्यापर्यंत पोहोचली कशी, हा प्रश्न तेव्हापासून सगळ्यांना पडला होता. आता ठाकरे गटाचे खासदार संजय राऊत यांनी त्यावर मोठा दावा केला आहे.

राऊत यांच्या म्हणण्यानुसार ही टेप भाजपच्या विधान परिषदेतील एका आमदारानेच फोडली. मनोज जरांगे पाटील यांच्या उपोषणाच्या काळात हा आमदार चर्चेसाठी सतत त्यांच्यासोबत असायचा, असे राऊत म्हणाले. हा आमदार कोण आहे, हे मुख्यमंत्री देवेंद्र फडणवीस यांना माहिती आहे, असेही त्यांनी सांगितले. शनिवारी मुंबईत आयोजित केलेल्या पत्रकार परिषदेत ते बोलत होते.

फडणवीस मुख्यमंत्री आहेत, गृहमंत्रीही आहेत, आणि ते छोटे चाणक्य आहेत, त्यामुळे त्यांना हे समजले पाहिजे, असे राऊत म्हणाले. क्लीपमध्ये ज्यांचे संभाषण सुरू आहे, ती भाजप आणि फडणवीस यांची कोअर टीम आहे, असा त्यांचा दावा आहे. ही कोअर टीम 500 कोटी रुपये दिल्याचे बोलत आहे. अशा वेळी या प्रकरणात एसआयटी नेमून चौकशी व्हावी असे मुख्यमंत्र्यांना वाटत नाही का, आणि ते कुणाला वाचवत आहेत, असे प्रश्न राऊत यांनी विचारले. एकमेकांना अडचणीत आणण्यासाठी क्लीपचा वापर होत आहे, असेही ते म्हणाले.

500 कोटींचा व्यवहार होऊनही चौकशी होणार नाही, असे राऊत यांनी म्हटले. मुंडवा जमीन प्रकरणात सुनेत्रा पवार कार्यालयातील अधिकाऱ्याला समन्स येतो, मग पाचशे कोटींच्या प्रकरणात गुन्हा का दाखल होत नाही, असा सवालही त्यांनी उपस्थित केला.

भाजपचे अंतर्गत संभाषण रेकॉर्ड झाले, म्हणजे गृहखाते तुमच्या विरोधात गेले आहे, असे राऊत म्हणाले. आधी आमचे फोन टॅप व्हायचे, आता तुमचे फोन टॅप होत आहेत. आमचे फोन रेकॉर्ड होतात तेव्हा फॉरेन्सिक लॅब टेस्ट होतात का, असेही त्यांनी विचारले. या प्रकरणात मनोज जरांगे हे मुख्य पात्र आहेत, तर देवेंद्र फडणवीस, एकनाथ शिंदे यांच्यासह बाकी सगळे एक्स्ट्रा कलाकार आहेत, असे राऊत म्हणाले.

क्लीपची चौकशी होईल, असे मुख्यमंत्री सांगत आहेत, पण ते खोटे बोलत आहेत, असा आरोप राऊत यांनी केला. टेप कुणी फोडली हा महत्त्वाचा मुद्दा आहे आणि ती फोडणारा आमदार मुख्यमंत्र्यांना माहिती आहे, असे त्यांनी पुन्हा सांगितले.

या क्लीपच्या निमित्ताने भाजप आणि शिवसेना एकमेकांच्या छातीवर आणि पाठीवर वार करताना दिसत आहेत, असे राऊत यांनी म्हटले. दोघांमधील युद्ध शिगेला पोहोचले असून ते कोणत्याही थराला जाईल. शिंदे यांचे मंत्री आडवे आले तर नायनाट होईल, असे म्हणतात, असेही त्यांनी सांगितले. भाजपमध्ये अंतर्गत दुफळी माजली आहे, असा दावा करत राऊत म्हणाले की एकनाथ शिंदे आणि देवेंद्र फडणवीस यांचे पानिपतचे युद्ध सुरू झाले आहे. पानिपत कुणाचे होते, हे आता कळेल, आणि पुढच्या महिन्यात कुणाचा शेवट होतो ते समजेल.