जरांगेंच्या ऑडिओ क्लिपमुळे महायुतीत वाद; 500 कोटींच्या आरोपानंतरही श्रीकांत शिंदे गप्प

मनोज जरांगे यांनी शेअर केलेल्या एका ऑडिओ क्लिपमुळे महायुतीत वादाची ठिणगी पडली आहे. या क्लिपमधून भाजपशी संबंधित काही लोकांची नावेही समोर आली आहेत. या प्रकरणात भाजपकडून श्रीकांत शिंदे यांच्या हस्ते 500 कोटी दिले गेल्याचा आरोप केला जात आहे.

या आरोपावरून मनोज जरांगे यांनी एकनाथ शिंदे यांना जाब विचारला होता. जरांगे यांच्या आरोपानंतर आता शिंदे गटाचे नेते थेट भाजपच्या नेत्यांवर निशाणा साधत आहेत. गेल्या दोन दिवसांत महायुतीतला तणाव वाढल्याचे दिसत आहे.

शिंदे गटाचे रामदास कदम यांनी भाजपचे नेते केसाने गळा कापण्याचा प्रयत्न करत असल्याचा आरोप केला. त्यांच्या या आरोपांना भाजप आमदार प्रसाद लाड यांनी आक्रमक उत्तर दिले आहे. शिवसेना नेते रामदास कदम यांच्या आरोपांना आमदार प्रवीण दरेकर यांनीही जोरदार उत्तर दिले.

दरेकर म्हणाले की, रामदास कदम यांनी बेजबाबदार वागणे चुकीचे आहे. पडद्याआडून जरांगेंना ताकद देणारे कोण होते, असा सवाल त्यांनी केला. देवेंद्र फडणवीस यांना बदनाम करायला कोण बसले होते, असेही त्यांनी विचारले. भाजपला दोष देणार असाल, तर जशास तसे उत्तर दिले जाईल, असे ते म्हणाले.

लाड यांनी कदम यांना उद्देशून सांगितले की, तुम्ही एकनाथ शिंदे आणि त्यांच्या मुलाबद्दल काय बोलता, हे बाहेर काढले तर तुम्हाला अवघड जाईल.

ऑडिओ क्लिपवरून शिंदे गट आणि भाजपमध्ये कलह सुरू झाला आहे. त्यामुळे दोन्ही पक्ष एकमेकांवर आरोप करत आहेत आणि एकमेकांवर कुरघोडी करण्याचे प्रयत्नही होताना दिसत आहेत. महायुतीच्या नेत्यांमध्ये चांगलीच खडाजंगी सुरू आहे.

राजकीय वातावरण इतके तापलेले असतानाही खासदार श्रीकांत शिंदे यांनी अजून कोणतीही भूमिका मांडलेली नाही. ते मौन बाळगून आहेत. जरांगे यांच्या 500 कोटींच्या आरोपांवर श्रीकांत शिंदे काय प्रतिक्रिया देणार, याकडे सगळ्यांचे लक्ष लागले आहे. त्यांच्या मौनामुळे राजकीय वर्तुळात चर्चांना उधाण आले आहे.