दुष्काळाचे संकट गडद, फडणवीसांची केंद्रीय पथकासोबत महत्त्वाची बैठक

महाराष्ट्रात यंदा दुष्काळसदृश परिस्थिती निर्माण झाली आहे. पावसाने अपेक्षित साथ दिली नाही, त्यामुळे शेतीचे मोठ्या प्रमाणात नुकसान झाले आहे. राज्यातील अनेक भागांत पाणीटंचाईचे संकट समोर उभे आहे. कापूस, सोयाबीन आणि तूर यांसारख्या पिकांच्या उत्पादनावर मोठा परिणाम झाल्याचे दिसत आहे.

या पार्श्वभूमीवर दुष्काळी परिस्थितीची पाहणी करण्यासाठी केंद्रीय पथक महाराष्ट्रात दाखल झाले आहे. गेल्या काही दिवसांपासून हे पथक राज्यातील विविध भागांना भेटी देऊन परिस्थितीची पाहणी करत आहे. रविवारी, 11 ऑक्टोबर रोजी या पथकासोबत मुख्यमंत्री देवेंद्र फडणवीस यांची बैठक झाली.

बैठकीला केंद्रीय दुष्काळ पाहणी पथकाचे प्रमुख, केंद्रीय संयुक्त सचिव मुक्तानंद अग्रवाल आणि पथकातील इतर सदस्य उपस्थित होते. मंत्री गिरीश महाजन, दत्तात्रय भरणे आणि मकरंद पाटील हेही बैठकीला हजर होते. राज्यातील दुष्काळाची तीव्रता, शेतीचे नुकसान आणि पाणीटंचाईची परिस्थिती यावर यावेळी चर्चा झाली.

बैठकीत मुख्यमंत्र्यांनी राज्यातील स्थिती केंद्रीय पथकासमोर मांडली. राज्यातील धरणांमधील पाणीसाठा कमी होत आहे आणि जनावरांच्या पिण्याच्या पाण्याचा प्रश्न गंभीर बनत आहे, हे त्यांनी पथकाच्या निदर्शनास आणून दिले. कापूस आणि सोयाबीनच्या उत्पादनात घट झाली असून तूर पिकालाही फटका बसला आहे, असे त्यांनी सांगितले.

राज्यात मोठे कृषी संकट निर्माण झाले असून येणाऱ्या रब्बी हंगामावरही त्याचे परिणाम होण्याची भीती आहे. त्यामुळे शेतकरी आणि शेतमजुरांना सर्व प्रकारची मदत देण्याची गरज आहे, असे फडणवीस यांनी स्पष्ट केले. मदतीचे नियोजन करताना सामान्य शेतकरी आणि शेतमजूर केंद्रस्थानी असतील, असेही त्यांनी सांगितले. केंद्रीय पथकाने राज्यातील विविध भागांचा दौरा करून परिस्थितीचा आढावा घेतल्याबद्दल मुख्यमंत्र्यांनी पथकाचे आभार मानले.

दुष्काळाच्या काळात पिण्याच्या पाण्याला सर्वोच्च प्राधान्य असेल. नागरिकांसोबतच जनावरांसाठीही पुरेसे पाणी उपलब्ध करून देण्याचे नियोजन राज्य सरकार करेल, अशी भूमिका मुख्यमंत्र्यांनी मांडली. पाण्याचे आरक्षण करण्यात आले आहे, असेही त्यांनी सांगितले.

केंद्रीय पथकाला प्राथमिक निवेदन सादर करण्यात आले असून लवकरच अंतिम अहवाल सादर केला जाणार आहे. आता केंद्रीय पथकाच्या अहवालानंतर राज्याला किती आर्थिक मदत मिळते, याकडे शेतकऱ्यांचे लक्ष लागले आहे. दुष्काळाचा सामना करताना शेती, पाणीपुरवठा आणि पशुधनाचे संरक्षण ही राज्यासमोरील मोठी आव्हाने ठरणार आहेत.