दुष्काळमुक्तीसाठी सर्व विभागांनी समन्वयाने काम करावे, मुख्यमंत्री फडणवीस यांचे निर्देश

मुंबई : राज्यातील दुष्काळी परिस्थितीवर कायमस्वरूपी मात करण्यासाठी सर्व विभागांनी एकमेकांशी समन्वय ठेवून, नियोजनबद्ध आणि वेगाने काम करावे, असे निर्देश मुख्यमंत्री देवेंद्र फडणवीस यांनी आज दिले. वर्षा निवासस्थानी झालेल्या जलसंधारणविषयक बैठकीत त्यांनी हे सांगितले. यावर्षी राज्यात वॉटर कप अभियान लवकर सुरू होत असून, त्या पार्श्वभूमीवर ही बैठक घेण्यात आली.

'पाणी अडवा, पाणी जिरवा' या संकल्पनेला प्राधान्य द्यावे आणि पावसाच्या पाण्याचा प्रत्येक थेंब अडविण्यासाठी जलसंधारणाची कामे प्रभावीपणे राबवावीत, असे फडणवीस यांनी स्पष्ट केले. पानी फाउंडेशनसह विविध स्वयंसेवी संस्था या क्षेत्रात काम करत आहेत. त्यांच्या कामांना प्रशासकीय यंत्रणेने सक्रिय सहकार्य करावे, असे त्यांनी सांगितले. जिल्हाधिकारी, मुख्य कार्यकारी अधिकारी आणि क्षेत्रीय अधिकाऱ्यांनी आपापसातील समन्वयातून या मोहिमेला गती द्यावी, असेही ते म्हणाले.

दुष्काळाच्या आव्हानावर मात करण्यासाठी सर्व विभागांनी एकत्रितपणे प्रयत्न करणे आवश्यक आहे, असे मुख्यमंत्र्यांनी नमूद केले. यापूर्वी जिल्हाधिकारी, मुख्य कार्यकारी अधिकारी, कृषी विभागाचे अधिकारी आणि क्षेत्रीय यंत्रणेने विविध कार्यक्रमांच्या अंमलबजावणीत उत्तम नेतृत्व आणि कार्यक्षमता दाखविली आहे, असे ते म्हणाले. अडचणीच्या काळात प्रशासकीय यंत्रणा उत्साहाने आणि जबाबदारीने कामाला लागली, की कामाचा वेग वाढतो, हे आपण अनुभवले आहे, असेही त्यांनी सांगितले. संपूर्ण महाराष्ट्रात पहाटेपासून काम सुरू असल्याचे चित्र यापूर्वी दिसले होते. त्याच तत्परतेने आणि समर्पित भावनेने आता जलसंधारणाच्या कामांसाठी पुढाकार घेण्याची गरज आहे, असे फडणवीस यांनी सांगितले.

या बैठकीत जलसंधारणाच्या कामांसाठी काही संकल्पना निश्चित झाल्या. त्यांच्या आधारे एकात्मिक कार्ययोजना तयार करावी, असे निर्देश मुख्यमंत्र्यांनी दिले. ही योजना प्रभावीपणे राबविण्यासाठी सक्षम प्रशासकीय यंत्रणा उभी करावी आणि कामांच्या प्रगतीवर लक्ष ठेवण्यासाठी तंत्रज्ञानाधारित संनियंत्रण प्रणाली विकसित करावी, असे ते म्हणाले. विविध विभागांच्या कामांचे एकत्रीकरण करून परस्पर समन्वयातून अंमलबजावणी करावी, तसेच सर्व संबंधित यंत्रणांनी सक्रिय सहभाग घेऊन कामांना विलंब होणार नाही याची दक्षता घ्यावी, असेही त्यांनी सांगितले.

जलसंधारणाची कामे केवळ कागदावरील नियोजनापुरती मर्यादित राहू नयेत, तर ती प्रत्यक्षात परिणामकारकपणे पूर्ण झाली पाहिजेत, असे मुख्यमंत्री म्हणाले. पहिला पाऊस पडताच पाणी अडविण्यासाठी जलसंधारणाच्या संरचना सज्ज असतील आणि त्यातून भूजलपातळी वाढण्यास मदत होईल, अशा पद्धतीने कामांचे नियोजन आणि अंमलबजावणी करावी, असे त्यांनी सांगितले.

या प्रयत्नांतून गावांना दुष्काळमुक्त करण्याच्या दिशेने ठोस पावले टाकता येतील आणि जनतेला मोठा दिलासा मिळेल, असा विश्वास फडणवीस यांनी व्यक्त केला. जलसंधारणाची ही महत्त्वपूर्ण मोहीम यशस्वी करण्यासाठी सर्व अधिकारी आणि संबंधित यंत्रणांनी एकजुटीने सहभागी व्हावे आणि या मोठ्या लढाईसाठी सज्ज व्हावे, असे आवाहनही मुख्यमंत्र्यांनी केले.