नागपुरात पुन्हा २४ तास शटडाऊन; नळ कोरडे असताना काटकसरीचा सल्ला, महापालिका आणि ओसीडब्ल्यूवर नागरिकांचा संताप

नागपूर शहरातील अनेक भागांत पाणीपुरवठा अनियमित आणि अपुरा असल्यामुळे नागरिकांना पिण्याच्या पाण्यासाठी वणवण करावी लागत आहे. एकीकडे नळाला पाणी येईल याची खात्री नाही, तर दुसरीकडे महापालिका आणि ओसीडब्ल्यू यांच्याकडून पाणी काटकसरीने वापरण्याचे आवाहन केले जात आहे.

यामुळे नागरिकांत संताप व्यक्त होत आहे. पाणीपुरवठा सुरळीत ठेवण्याची जबाबदारी ज्या यंत्रणांवर आहे, त्यांनी वारंवार होणाऱ्या गळती, दुरुस्ती आणि शटडाऊनच्या समस्यांवर कायमस्वरूपी उपाय करण्याऐवजी नागरिकांनाच काटकसरीचे सल्ले देणे कितपत योग्य, असा सवाल उपस्थित केला जात आहे.

मानकापूर चौकाजवळील पेंच-४ जलवाहिनीची गळती दुरुस्त करण्यासाठी मंगळवारी पुन्हा २४ तास पाणीपुरवठा बंद ठेवला जाणार आहे. त्यामुळे नागरिकांच्या अडचणी आणखी वाढणार आहेत. पाणी बंद राहण्याची वेळ पुन्हा एकदा नागरिकांवर आली आहे.

शहरातील पाणीपुरवठा यंत्रणेतील त्रुटींचा फटका नागरिकांना वारंवार सहन करावा लागत आहे. कधी जलवाहिनीला गळती लागते, कधी तांत्रिक बिघाड होतो, तर कधी देखभाल-दुरुस्तीच्या नावाखाली पाणीपुरवठा बंद केला जातो. ही कामे आवश्यक असली, तरी त्यांचे योग्य नियोजन करणे ही महापालिका आणि ओसीडब्ल्यूची जबाबदारी आहे.

प्रत्येक वेळी शटडाऊन जाहीर करून नागरिकांना पाणी साठवून ठेवण्याचे आणि काटकसरीने वापरण्याचे आवाहन केले जाते. पण अनेक भागांत आधीच पुरेसे पाणी मिळत नसताना अशा सूचनांचा उपयोग काय, असा प्रश्न लोक विचारत आहेत. नागरिकांना नियमित आणि पुरेसा पाणीपुरवठा मिळणे अपेक्षित असताना त्यांना वारंवार गैरसोयीचा सामना करावा लागत आहे. त्यामुळे तात्पुरत्या दुरुस्त्यांऐवजी यंत्रणेतील त्रुटी दूर करून कायमस्वरूपी उपाययोजना करण्याची गरज आहे.

उन्हाळ्यात पाण्याची मागणी वाढणार, जलस्रोतांवरील ताण वाढणार आणि त्याचवेळी जलवाहिन्यांच्या दुरुस्तीची कामे सुरू राहणार असतील, तर नागपूरकरांना पुन्हा मोठ्या पाणीबाणीला सामोरे जावे लागू शकते. म्हणूनच महापालिका आणि ओसीडब्ल्यूने आता केवळ शटडाऊनच्या सूचना आणि काटकसरीचे सल्ले देण्यापलीकडे जाऊन पाणीपुरवठा यंत्रणेतील त्रुटी कायमस्वरूपी दूर करण्यावर भर देण्याची गरज आहे.

पाण्यासारख्या मूलभूत गरजेच्या प्रश्नावर नागरिकांना वारंवार वेठीस धरणे योग्य नाही. आधी पाणीपुरवठा सुरळीत करा, मग काटकसरीचे धडे द्या, एवढीच नागरिकांची अपेक्षा आहे. पाणीबाणी लवकर संपवली नाही, तर आतापर्यंत घराघरांत व्यक्त होणारा संताप उफाळून लोक रस्त्यावर येण्याची शक्यता नाकारता येणार नाही. महापालिका आणि ओसीडब्ल्यूने याची गंभीर दखल घेण्याची वेळ आली आहे.