चंद्रपूरमध्ये दुष्काळी १२ तालुक्यांतील पंचनामे १० ऑक्टोबरपर्यंत संपवा, जिल्हाधिकाऱ्यांचे आदेश

चंद्रपूर जिल्ह्यातील दुष्काळी तालुक्यांतील पंचनामे १० ऑक्टोबरपर्यंत पूर्ण करावेत, असे स्पष्ट आदेश जिल्हाधिकारी वसुमना पंत यांनी दिले आहेत. पाऊस कमी पडला आणि मध्येच त्याने मोठा खंड दिला, त्यामुळे जिल्ह्यातील १२ तालुके दुष्काळग्रस्त म्हणून घोषित झाले आहेत. या तालुक्यांतील १,५७९ गावांमध्ये पंचनाम्यांचे काम सुरू असून, सध्या ५० ते ६० टक्के पंचनामे झाले आहेत.

जिल्हाधिकारी कार्यालयात दुष्काळ निवारणासंदर्भात आढावा बैठक झाली. त्यात बोलताना पंत यांनी सांगितले की, नुकसान झालेल्या शेतीच्या पंचनाम्यांकडे प्रशासनाने अतिशय गांभीर्याने पाहावे. या कामात कुठल्याही प्रकारचा हलगर्जीपणा खपवून घेतला जाणार नाही, असेही त्यांनी स्पष्ट केले.

प्रत्येक तहसीलदाराने रोज संध्याकाळी पंचनाम्यांच्या कामाचा आढावा घ्यावा, असे निर्देश आहेत. किती क्षेत्राचे आणि किती खातेदारांचे पंचनामे झाले, याची ताजी माहिती गूगल शीटमध्ये नियमितपणे भरावी. राज्य शासन या कामाचा नियमित आढावा घेत असल्याने सर्व पंचनामे १० ऑक्टोबरपर्यंत संपवावेत, असे त्यांनी सांगितले.

तालुका आणि गावपातळीवरील अधिकारी व कर्मचारी यांच्यात योग्य समन्वय ठेवावा, असेही त्यांनी सांगितले. पंचनाम्यात कोणतीही चूक राहू नये म्हणून तहसीलदारांनी वेळोवेळी प्रत्यक्ष शेतात जाऊन कामाची पडताळणी करावी आणि भरलेल्या माहितीची फेरतपासणी करावी. प्रत्येक पंचनाम्यावर संबंधित शेतकऱ्याची सही घेणे आवश्यक आहे. पूर्ण झालेल्या पंचनाम्यांची यादी चावडी आणि ग्रामपंचायत पातळीवर प्रसिद्ध करावी, असेही सांगण्यात आले.

पाणीटंचाईचा आढावा घेताना पंत म्हणाल्या की, सध्या उपलब्ध असलेले जलस्रोत प्राधान्याने पिण्याच्या पाण्यासाठी राखून ठेवणे गरजेचे आहे. राखीव जलस्रोतांतून बेकायदा पाणी उपसले जात असेल, तर संबंधितांवर कडक कारवाई करावी. सध्या पाणी उपलब्ध असले तरी येणारा उन्हाळा आणि पुढच्या पावसाळ्यापर्यंत पाणीपुरवठ्याचे नीट नियोजन करणे गरजेचे आहे. त्यासाठी प्रत्येक तालुक्याने उपलब्ध जलसाठा आणि संभाव्य मागणी लक्षात घेऊन आतापासूनच नियोजन करावे, असेही त्यांनी सांगितले.

रोजगार हमी योजनेतून गावांमध्ये जलतारा आणि जलसंधारणाची जास्तीत जास्त कामे हाती घ्यावीत, अशा सूचना देण्यात आल्या. संबंधित विभागांनी या कामांसाठी निश्चित उद्दिष्ट ठरवून तातडीने अंमलबजावणी सुरू करावी. दुष्काळग्रस्त भागातील शेतकऱ्यांकडून कर्जवसुलीबाबत कोणत्याही बँकेविरुद्ध तक्रार येणार नाही, याची काळजी बँकांनी घ्यावी. जिल्ह्यात सध्या किती चारा उपलब्ध आहे, याची तालुकानिहाय माहिती पशुसंवर्धन विभागाने तातडीने सादर करावी, असेही जिल्हाधिकारी पंत यांनी सांगितले.

या बैठकीला जिल्हा परिषदेचे मुख्य कार्यकारी अधिकारी पुलकित सिंह, निवासी उपजिल्हाधिकारी दगडू कुंभार, उपजिल्हाधिकारी (रोहयो) शुभम दांडेकर, महावितरणचे अधीक्षक अभियंता मनोज दाभर्डे, जिल्हा पुरवठा अधिकारी राहुल बहादुरकर, पशुसंवर्धनचे सहाय्यक आयुक्त डॉ. सुरेश कुंबरे, भूजल वैज्ञानिक लिना बाराहाते आणि जिल्हा आपत्ती व्यवस्थापन अधिकारी सलीम शेख उपस्थित होते. दूरदृश्य प्रणालीद्वारे सर्व उपविभागीय अधिकारी, तहसीलदार, गटविकास अधिकारी आणि तालुका कृषी अधिकारी बैठकीत सहभागी झाले.