मानकापूर चौकाजवळ जलवाहिनीला गळती, नागपुरात 13 ऑक्टोबरला 24 तास पाणीपुरवठा बंद
पेंच-4 च्या 1400 मिमी व्यासाच्या जलवाहिनीतील गळतीमुळे 13 ऑक्टोबरच्या सकाळी 6 ते 14 ऑक्टोबरच्या सकाळी 6 पर्यंत पाणी बंद राहणार आहे.
छायाचित्रे सत्यापित केलेली नाहीत
नागपूर महानगरपालिका आणि ऑरेंज सिटी वॉटर (OCW) यांच्या कारभाराचा फटका शहरातील नागरिकांना पुन्हा एकदा सहन करावा लागणार आहे. मानकापूर चौकाजवळ पेंच-4 च्या 1400 मिमी व्यासाच्या मुख्य जलवाहिनीला गळती लागली असून, त्याचे कारण पुढे करत शहराचा पाणीपुरवठा तब्बल 24 तास बंद ठेवण्याचे आदेश काढण्यात आले आहेत.
हा शटडाउन 13 ऑक्टोबरच्या सकाळी 6 वाजल्यापासून 14 ऑक्टोबरच्या सकाळी 6 वाजेपर्यंत चालणार आहे. म्हणजेच या संपूर्ण दिवसभर आणि रात्रभर नळाला पाणी येणार नाही. दुरुस्तीसाठी 'सुधारणा काम' आणि 'शटडाउन' घेतले जात असले, तरी प्रत्येक वेळी प्रमाणे यावेळीही प्रशासकीय अपयश झाकण्यासाठी याच दोन गोष्टींचा आधार घेतला जात असल्याची टीका होत आहे.
कोटी रुपयांच्या बजेटचा आणि मोठमोठ्या तंत्रज्ञानाचा दावा करणाऱ्या संस्था मूलभूत सुविधांची देखभाल वेळेत का करू शकत नाहीत, असा प्रश्न यानिमित्ताने विचारला जात आहे. जलवाहिनीला वारंवार गळती लागणे आणि त्यानंतर संपूर्ण शहराचा पाणीपुरवठा थांबवणे हा आता ओसीडब्ल्यूच्या कार्यपद्धतीचाच भाग बनला आहे, अशी टीका आहे.
नागपूर महानगरपालिकेने नागरिकांना जलसंवर्धन करण्याचे आणि सहकार्य करण्याचे आवाहन केले आहे. मात्र ठोस नियोजन नसताना वारंवार 24-24 तासांचा शटडाउन जाहीर होत असल्याने सामान्य जनतेचा संयम आता सुटत चालला आहे.
देखभालीच्या नावाखाली मोठा खर्च होतो, मग जलवाहिनीत वारंवार बिघाड का होतो, असा नागरिकांचा सवाल आहे. वेळेवर दुरुस्ती करता न येण्याचा हा प्रशासकीय अपयशाचा फटका थेट लोकांच्या दैनंदिन जीवनावर आणि आरोग्यावर बसत आहे.
असे शटडाउन वारंवार होत असल्याने सध्याच्या पाणीपुरवठा यंत्रणेत मोठ्या तांत्रिक त्रुटी असल्याचे दिसून येते. केवळ गळती बुजवून किंवा औपचारिकता पूर्ण करून या त्रुटी दूर होणार नाहीत.
स्थानिक नागरिक आणि सामाजिक संघटनांनी मनपा आणि ऑरेंज सिटी वॉटर प्रशासनाकडे या संपूर्ण व्यवस्थेची उच्चस्तरीय चौकशी करण्याची मागणी केली आहे.
त्याचबरोबर जलवाहिन्यांचे टिकाऊपण आणि दर्जा यांचा आढावा घेऊन दीर्घकालीन कृती आराखडा तयार करावा, म्हणजे प्रत्येक वेळी किरकोळ दुरुस्तीच्या नावाखाली शहरवासीयांना ही मोठी गैरसोय आणि पाणीटंचाई सहन करावी लागणार नाही, अशी त्यांची अपेक्षा आहे.
जलसंकटाचा त्रास नागरिकांच्या दिनचर्येवर आणि आरोग्यावर होत असल्याने मनपा प्रशासनाने कृती आराखडा तयार करावा, अशी मागणी नागरिकांकडून केली जात आहे.
