रत्नागिरीत पाणीटंचाई टाळण्यासाठी नगरपरिषदेचा निर्णय: दर सोमवारी पुरवठा बंद, मंगळवारपासून १० टक्के कपात

रत्नागिरी शहराला पाणीटंचाईचा त्रास पुढे होऊ नये, यासाठी नगरपरिषदेने आतापासूनच पाणीकपातीचे नियोजन आखले आहे. शहराला मुख्यत्वे शीळ धरणातून पाणीपुरवठा होतो आणि सध्या या धरणात ९९ टक्के इतका मुबलक साठा आहे. तरीही येत्या काळात उष्णता वाढण्याची शक्यता असून त्यामुळे पाण्याचे बाष्पीभवन वेगाने होऊन साठा कमी होऊ शकतो. हे लक्षात घेऊन खबरदारी म्हणून नगरपरिषदेने हा निर्णय घेतला आहे.

पुढील पाच ते सहा महिन्यांत शहरात कुठल्याही प्रकारची पाणीटंचाई निर्माण होऊ नये, हेच पालिकेचे मुख्य उद्दिष्ट असल्याचे रत्नागिरी नगरपरिषदेचे पाणी सभापती निमेश नायर यांनी सांगितले. ते पत्रकार परिषदेत बोलत होते. या पत्रकार परिषदेला नगराध्यक्ष शिल्पाताई सुर्वे आणि उपनगराध्यक्ष समीर तिवरेकर उपस्थित होते. त्यांनीही पाणीटंचाईच्या धोरणाबाबत पत्रकारांना माहिती दिली.

शहराला रोज २० एमएलडी पाणी लागते. त्यातून बचत व्हावी म्हणून दर सोमवारी पाणीपुरवठा बंद म्हणजेच शटडाऊन ठेवला जाणार आहे. यामुळे महिन्याला सुमारे ८० एमएलडी पाण्याची मोठी बचत होईल आणि साठा दीर्घकाळ टिकवणे शक्य होईल. याशिवाय रोजच्या पाणीपुरवठ्याच्या वेळेत १५ मिनिटांची कपात करून पाण्याचा अपव्यय टाळला जाईल. या उपायांमुळे उपलब्ध साठा एप्रिल आणि मे महिन्यापर्यंत पुरवता येईल, असे नायर यांनी सांगितले. येत्या मंगळवारपासून दहा टक्के पाणीकपातही लागू होणार आहे.

शीळ धरणातील साठा जपण्यासोबतच नगरपरिषदेने पर्यायी आणि नवीन पाणीस्रोतांवरही वेगाने काम सुरू केले आहे. त्यातला सर्वांत मोठा दिलासा म्हणजे नव्याने बांधलेल्या पानवल धरणातून येत्या दोन महिन्यांनंतर शहराला पाणीपुरवठा सुरू होणार आहे. पानवल धरणात सध्या मुबलक पाणी आहे, पण ते शहरापर्यंत आणण्यात काही तांत्रिक अडचणी येत होत्या. धरणापासून जलवाहिनी जोडण्याचे काम प्रलंबित असल्याने हे पाणी थेट वापरणे आतापर्यंत शक्य झाले नव्हते.

पानवल धरणावरून शहरात पाणी आणण्यासाठी १३०० मीटर अंतराची मुख्य जलवाहिनी टाकण्याचे काम अपूर्ण राहिले होते. त्यामुळे धरणात पाणी असूनही ते रत्नागिरीकरांसाठी वापरता येत नव्हते. मात्र पालकमंत्री आणि जिल्हाधिकारी यांच्या मध्यस्थीनंतर कंत्राटदारांचे प्रलंबित बिल आणि निधीचा प्रश्न मार्गी लागला आहे. आता या कामातील सर्व अडथळे दूर झाले असून प्रत्यक्ष कामाला गती देण्यात आली आहे. पुढील दोन महिन्यांत ही १३०० मीटरची जलवाहिनी जोडण्याचे काम पूर्ण केले जाईल, असा विश्वास प्रशासनाने व्यक्त केला आहे.