तटकरेंच्या विलिनीकरणाच्या विधानावर अनिल पाटील म्हणाले, प्रेशर वाटत नाही

राष्ट्रवादीचे प्रदेशाध्यक्ष सुनील तटकरे यांनी एक विधान केलं आहे. अजित पवार असते तर दोन्ही राष्ट्रवादींचं विलिनीकरण झालं असतं, असं ते म्हणाले. विलिनीकरणाची चर्चा झाली होती आणि त्याची कल्पना अजितदादांनी आपल्याला दिली होती, असंही तटकरे यांनी म्हटलं आहे. या विधानामुळे दोन्ही राष्ट्रवादींच्या विलिनीकरणाच्या चर्चेला पुन्हा एकदा हवा मिळाली आहे.

तटकरे यांनी असं विधान करून उपमुख्यमंत्री सुनेत्रा पवार यांच्यावर दबाव आणण्याची सुरुवात केल्याचं सांगितलं जात आहे. यावर अजितदादा गटाचे नेते अनिल पाटील यांनी थेट शब्दांत प्रतिक्रिया दिली आहे.

अनिल पाटील यांच्या म्हणण्यानुसार, ही प्रेशर टॅक्टिस वाटत नाही. गेले चार दिवस पक्षाच्या कोअर कमिटीच्या बैठका सुरू आहेत, असं त्यांनी सांगितलं. आपले नेते एनडीएच्या नेत्यांशी चर्चा करत आहेत. महाराष्ट्रातील समस्या आणि इतर विषयांवर बोलण्यासाठी ते गेले होते. त्यामुळे अशा भेटीगाठींमुळे सुनीता वहिनींवर प्रेशर येईल असं आपल्याला वाटत नाही, असं पाटील म्हणाले. सुनीता वहिनींशी चर्चा करूनच आपल्या नेत्यांनी एनडीएच्या नेत्यांशी बोलणी केली, असंही त्यांनी सांगितलं.

पक्षात निर्णय एकमताने होतात, असं पाटील यांचं म्हणणं आहे. अजितदादा असते तर काय झालं असतं आणि काय नसतं, हा विषय आता राहिलेला नाही, असं ते म्हणाले. अजितदादांनी काही निर्णय घेतला असता तर आम्ही त्यांच्यासोबत राहिलो असतो, असं सांगून पाटील यांनी पुढे म्हटलं की, आता जो काही निर्णय व्हायचा असेल तो सुनीता वहिनींच्या नेतृत्वाखाली होईल.

विलिनीकरणाबद्दल पाटील यांनी मागचा संदर्भही दिला. अजितदादा गेले तेव्हा आपल्यातल्या काही लोकांनी विलिनीकरणाबद्दल विधान केलं होतं, असं ते म्हणाले. अजितदादा गेल्यानंतर गटनेता निवडतानाही विलिनीकरणाबद्दल विचारणा झाली होती. तेव्हा प्रफुल्ल पटेल, सुनील तटकरे आणि छगन भुजबळ यांनी अशी चर्चा झाली नसल्याचं म्हटलं होतं, असं पाटील यांनी सांगितलं. अजितदादांशी शरद पवार गटाची चर्चा झाली असेल, पण आमच्यासोबत काही चर्चा झाली नाही आणि आम्हाला त्याची काही माहिती नाही, असं या नेत्यांनी त्यावेळी स्पष्ट केलं होतं, असंही ते म्हणाले.

परवा पक्षाची बैठक झाली, तेव्हाही तटकरेंनी विलिनीकरणाबद्दल काहीच भाष्य केलं नाही, असं पाटील यांनी सांगितलं. आता त्यांनी हे विधान केलं असेल तर ते कशासाठी केलं, हे त्यांनाच माहीत आहे आणि त्यांनाच विचारलं पाहिजे, असं ते म्हणाले. दादांनी विलिनीकरणाची चर्चा केली नाही, असं तटकरे नेहमी सांगत होते. आमच्यासोबत ज्या ज्या बैठका झाल्या, त्यात ते हेच सांगत होते, असंही पाटील यांनी नमूद केलं. सध्याच्या क्षणी आमच्या स्तरावर विलिनीकरणाची कोणतीही चर्चा नाही. वरिष्ठ स्तरावर झाली की नाही, हे आपल्याला माहीत नाही, असं त्यांनी स्पष्ट केलं.

पक्षातल्या नियुक्त्यांवरून सुरू असलेल्या वादावरही पाटील यांनी भाष्य केलं. अजितदादा गेल्यापासून काही नियुक्त्या रिक्त होत्या आणि त्या आता भरल्या गेल्या, असं ते म्हणाले. आठ महिन्यांत या नियुक्त्यांबाबत काहीच निर्णय झाला नव्हता. आता नियुक्त्या झाल्यावर त्या का झाल्या, अशी चर्चा होत आहे. संघटनेच्या दृष्टीने या नियुक्त्या महत्त्वाच्या असतात. नियुक्त्यांवर प्रदेशाध्यक्षांची सही असते. मतभेद असू शकतात, पण निर्णय एकमताने होतो, असं पाटील म्हणाले.