निधी मिळाला नाही तर जेवढ्या मतांनी निवडून आलो, तेवढ्याच मतांनी पडू शकतो, राष्ट्रवादीच्या आमदाराने सुनेत्रा

राष्ट्रवादी काँग्रेस पक्षात सध्या अंतर्गत संघर्ष सुरू आहे. त्याच पार्श्वभूमीवर मंगळवारी रात्री मुंबईतील देवगिरी बंगल्यावर पक्षाच्या आमदारांची महत्त्वाची बैठक झाली. उपमुख्यमंत्री सुनेत्रा पवार या बैठकीला उपस्थित होत्या. ही बैठक वादळी ठरली आणि जवळपास चार तास चालली. या बैठकीत राष्ट्रवादी काँग्रेसच्या आमदारांनी घडाघडा बोलत आपल्या तक्रारींचा पाढा नेतृत्वासमोर मांडला.

सुनेत्रा पवार यांनी बैठकीच्या सुरुवातीलाच आमदारांना स्पष्ट बजावले होते की राजकारण नको, फक्त तक्रारी आणि सूचना करा. त्यानंतर सगळ्या आमदारांनी एकेक करून आपल्या तक्रारी त्यांच्यासमोर वाचून दाखवल्या.

जवळपास सर्वच आमदारांनी निधी मिळत नसल्याची तक्रार बोलून दाखवली. आपला पक्ष सत्तेत असूनही कामे होत नाहीत, असे त्यांनी सांगितले. काही आमदारांनी एकनाथ शिंदे यांच्याकडून कामे होत नसल्याची तक्रारही केली.

नाशिक जिल्ह्यातील एका महिला आमदाराने कुंभमेळ्याची एवढी कामे सुरू आहेत, पण त्यामध्ये भाजप राष्ट्रवादी काँग्रेसला डावलत आहे, असे सांगितले. या कामांपैकी एकाही कामात राष्ट्रवादी काँग्रेस पक्षाला विचारात घेतले जात नाही, अशी तक्रार या महिला आमदाराने बोलून दाखवली.

नाशिकमधीलच आणखी एका आमदाराने अशाच प्रकारे खंत व्यक्त केली. निधी मिळाला नाही तर मी जेवढ्या मतांनी निवडून आलो आहे, तेवढ्याच मतांनी पुढच्या निवडणुकीत पडू शकतो, असे त्यांनी सांगितले.

राष्ट्रवादीच्या एका आमदाराने साताऱ्यातील भाजपच्या वाढत्या दादागिरीबद्दल चिंता व्यक्त केली. सातारा जिल्ह्यात भाजपची दादागिरी वाढली आहे, असे त्यांचे म्हणणे होते. जिल्हा परिषद निवडणुकीत आपल्याला कशा प्रकारे त्रास देण्यात आला, असे या आमदाराने सांगितले. त्यामुळे आपण नंतर जिल्हा बँकेची निवडणूक शिवसेनेसोबत लढलो, असेही या आमदाराने सुनेत्रा पवार यांना सांगितले.

सध्या पक्षातील वरिष्ठ नेत्यांमध्ये जे वाद सुरू आहेत, त्याबद्दल आमच्यापर्यंत फारच थोड्या गोष्टी कळतात, असे आमदारांनी सांगितले. पक्षातील तरुण नेते आणि वरिष्ठ नेते यांच्यात सुरू असलेल्या संघर्षामुळे पक्ष कमकुवत होत आहे, अशी भावना आमदारांनी व्यक्त केली.

सुनेत्रा पवार यांनी या सगळ्या तक्रारी ऐकून घेतल्या आहेत. मात्र, या सगळ्यावर त्यांची काय प्रतिक्रिया होती किंवा त्यांनी सर्व आमदारांना कशा प्रकारे आश्वस्त केले, याबद्दल अद्याप काही कळू शकलेले नाही.

बुधवारी सकाळी 9 वाजता राष्ट्रवादीच्या कोअर कमिटीची बैठक होणार आहे. या बैठकीतही काय घडणार, याची उत्सुकता सर्वांना लागून राहिली आहे.