राष्ट्रवादी कोअर कमिटीची बैठक: पटेल, तटकरे यांच्या पदांवर चर्चाच नाही, सुनेत्रा पवारांचे मौन

राष्ट्रवादी काँग्रेस पक्षाच्या कोअर कमिटीची बैठक आज सकाळी साडेनऊ वाजता देवगिरी निवासस्थानी झाली. पण पक्षातल्या अंतर्गत वादावर या बैठकीत कुणी काही बोललं नाही, आणि प्रफुल्ल पटेल व सुनील तटकरे यांच्या पदांचा विषयही निघाला नाही, असं सांगितलं जात आहे.

अजित पवार यांच्या निधनानंतर राष्ट्रवादीतले अंतर्गत वाद चव्हाट्यावर आले आहेत, आणि ते काही संपताना दिसत नाहीत. पार्थ पवार यांचा पक्षातला वाढलेला हस्तक्षेप आणि विधान परिषद निवडणुकीत पक्षाला आलेलं अपयश, यामुळे नाराजी आणखी वाढली आहे, असं सांगितलं जातं. पक्षाच्या काही वरिष्ठ नेत्यांनी दिल्लीत केंद्रीय गृहमंत्री अमित शाह यांची भेट घेतली आणि थेट पार्थ पवार यांची तक्रार केली, असंही बोललं जात आहे. त्यामुळे आजच्या बैठकीत या वादाचे पडसाद उमटतील, अशी चर्चा होती.

बैठकीला पक्षाचे नेते प्रफुल्ल पटेल, सुनील तटकरे, छगन भुजबळ, दिलीप वळसे पाटील, धनंजय मुंडे, हसन मुश्रीफ आणि समीर भुजबळ उपस्थित होते. बैठकीची अध्यक्षता उपमुख्यमंत्री सुनेत्रा पवार यांनी केली. पार्थ पवारही तिथे हजर होते. मात्र अंतर्गत वादाच्या मुद्द्यावर सुनेत्रा पवार आणि पार्थ पवार यांनी मौन बाळगलं, असं सांगण्यात येत आहे. त्यामुळे दोघांच्या मनात नेमकं काय आहे, याबद्दल तर्कवितर्क सुरू झाले आहेत. पक्षातली खदखद आता शांत होणार की नाही, अशी चर्चाही रंगली आहे.

सुनेत्रा पवार आणि पार्थ पवार यांनी अलीकडेच पक्षातल्या काही नियुक्त्या जाहीर केल्या होत्या. त्या कायम ठेवण्याचा निर्णय बैठकीत झाला आहे. त्यानुसार झिशान सिद्धकी हे राष्ट्रवादीचे मुंबई अध्यक्ष म्हणून आणि उमेश पाटील हे मुख्य प्रवक्ते म्हणून कायम राहतील. या दोघांचं पुढच्या सहा महिन्यांतलं काम पाहून मग निर्णय घेऊ, अशी भूमिका पार्थ पवार यांनी बैठकीत मांडल्याचं सांगितलं जात आहे. पुढच्या काळात कोअर कमिटीला विचारात घेऊनच निर्णय घेतले जातील, असंही पार्थ पवार यांनी पुन्हा सांगितल्याचं सांगितलं जात आहे.

या बैठकीतली सर्वात महत्त्वाची गोष्ट म्हणजे प्रदेशाध्यक्ष सुनील तटकरे आणि पक्षाचे राष्ट्रीय कार्याध्यक्ष प्रफुल्ल पटेल यांच्या पदांवर चर्चाच झाली नाही. त्यामुळे या दोन्ही नेत्यांच्या पदांबाबतचा संभ्रम अजूनही कायम आहे, असं सूत्रांनी सांगितलं. या पदांबाबत कोणताही निर्णय न झाल्याने आश्चर्यही व्यक्त केलं जात आहे.