राष्ट्रवादीत नाराजी नाही, दिल्लीची भेट ठरलेलीच होती, असे तटकरे यांनी मुंबईतील बैठकीनंतर सांगितले

राष्ट्रवादी काँग्रेसच्या प्रमुख नेत्यांची एक महत्त्वाची बैठक आज मुंबईत झाली. या बैठकीत काय चर्चा झाली, याची माहिती पक्षाचे प्रदेशाध्यक्ष आणि खासदार सुनील तटकरे यांनी दिली. पक्षात कुठेही नाराजी नाही आणि दिल्लीतील बैठक आधीपासूनच ठरलेली होती, असे तटकरे यांनी सांगितले.

तटकरे यांच्या म्हणण्यानुसार, पक्षातील जे प्रमुख नेते तीन ते पाच वेळा निवडून आले आहेत, त्यांची आज राष्ट्रीय अध्यक्षा आणि उपमुख्यमंत्री सुनेत्रा पवार यांच्यासोबत बैठक झाली. पक्षाची पुढची भूमिका आणि पक्षवाढ हा या बैठकीचा विषय होता, असे ते म्हणाले. पक्षाची भूमिका, पुढची वाटचाल आणि पक्षबांधणी यावरच आजची चर्चा झाली, असेही त्यांनी स्पष्ट केले.

उद्या सर्व आमदारांची बैठक बोलावली असल्याचे तटकरे यांनी सांगितले. आमदारांची मते जाणून घेण्यासाठी याआधी अजितदादा असताना आणि त्यांच्याही आधी अशा बैठका होत होत्या. मध्यंतरी आपले नेते कामानिमित्त व्यस्त असल्यामुळे त्या बैठका होऊ शकल्या नाहीत, असे तटकरे म्हणाले. कुठेही नियुक्ती किंवा नाराजीचा विषय नाही, असेही त्यांनी सांगितले. विलीनीकरणाबाबतची चर्चा याआधीच थांबलेली आहे, असेही तटकरे यांनी म्हटले.

पवारसाहेबांबद्दल बोलताना तटकरे म्हणाले की, ते सहा दशके राजकारणात आहेत आणि यापूर्वी त्यांनी मोठ्या आजारावर मात केली आहे. दुष्काळी परिस्थितीनंतर त्यांनी दौरे सुरू केले होते, असेही तटकरे यांनी सांगितले. त्यांना नुकतेच रुग्णालयात दाखल केल्याचे समजले, असे सांगून तटकरे म्हणाले की, त्यांचे काम आणि लोकांबद्दलची आपुलकी पाहता ते लवकर बरे व्हावेत, अशीच पक्षाची इच्छा आहे.

आजची बैठक राष्ट्रवादी काँग्रेसच्या कोअर कमिटीची होती. बैठकीला खासदार पार्थ पवार, पक्षाच्या प्रमुख सुनेत्रा पवार, प्रफुल पटेल, सुनील तटकरे, धनंजय मुंडे, दिलीप वळसे पाटील आणि छगन भुजबळ उपस्थित होते. गृहमंत्री अमित शाह यांच्यासोबत झालेल्या चर्चेबाबत आजच्या बैठकीत बोलणे होणार होते, अशी माहिती सूत्रांकडून मिळाली होती.

दरम्यान, केंद्रीय गृहमंत्री अमित शाह आणि राष्ट्रवादीचे ज्येष्ठ नेते यांच्यात आज दिल्लीत झालेल्या भेटीवरही पक्षाने भूमिका मांडली. पक्षाचे राष्ट्रीय प्रवक्ते उमेश पवार यांनी सांगितले की, या भेटीला अनावश्यक राजकीय रंग देऊन पक्षांतर्गत मतभेदांचे कथानक उभे करण्याचा प्रयत्न अत्यंत दुर्दैवी आहे. पक्षाच्या ज्येष्ठ नेत्यांचे एक शिष्टमंडळ भेट घेणार आहे, याची कल्पना सुनेत्रा पवार यांनीच अमित शाह यांना दिली होती, असे उमेश पवार यांनी सांगितले. तसेच त्यासाठी वेळ उपलब्ध करून द्यावा, अशी विनंतीही त्यांनी केली होती. त्यामुळे ज्येष्ठ नेत्यांची ही भेट सुनेत्रा पवार यांच्या आदेशानेच झाली, असे उमेश पवार यांनी स्पष्ट केले.