ब्रीच कँडीत पवारांना भेटले प्रफुल पटेल; 10 तारखेनंतर बसण्याचा व्हिडिओ समोर

राष्ट्रवादी काँग्रेस (शरदचंद्र पवार) पक्षाचे अध्यक्ष शरद पवार यांच्यावर सध्या मुंबईतील ब्रीच कँडी रुग्णालयात उपचार सुरू आहेत. अजित पवार यांच्या राष्ट्रवादी काँग्रेसचे राष्ट्रीय कार्याध्यक्ष प्रफुल पटेल यांनी काल रुग्णालयात जाऊन त्यांची भेट घेतली आणि तब्येतीची चौकशी केली. या भेटीनंतर राजकीय वर्तुळात वेगवेगळ्या चर्चा सुरू झाल्या आहेत.

पटेल यांनी स्वतः सोशल मीडियावर लिहिले की, आदरणीय शरद पवार साहेबांची मुंबईतील ब्रीच कँडी रुग्णालयात जाऊन सदिच्छा भेट घेतली आणि त्यांच्या तब्येतीची विचारपूस केली.

या भेटीत राजकीय विषयांवरही बोलणे झाल्याची माहिती समोर येत आहे. दरम्यान, पवार आणि पटेल यांच्यातील संवादाचा एक व्हिडिओ आता बाहेर आला आहे. त्यात शरद पवार हे प्रफुल पटेल यांना, 10 तारखेनंतर एकत्र बसून चर्चा करू, असे सांगताना दिसतात. त्यामुळे 10 तारखेनंतर नेमक्या कोणत्या विषयावर चर्चा होणार, याची उत्सुकता वाढली आहे.

सूत्रांकडून मिळालेल्या माहितीनुसार, भेटीच्या वेळी पवार यांनी पटेल यांना केंद्रीय गृहमंत्री अमित शाह यांच्यासोबत झालेल्या बैठकीबद्दल विचारले. व्हायरल होत असलेल्या या सिलेक्टीव्ह व्हिडिओनंतर दोन्ही राष्ट्रवादींच्या पुढच्या राजकीय भूमिकेकडे सगळ्यांचे लक्ष लागले आहे.

पवार यांची प्रकृती बिघडल्यानंतर पंतप्रधान नरेंद्र मोदी यांनीही त्यांना फोन करून तब्येतीची चौकशी केली होती. पवार यांचे निकटवर्तीय विठ्ठल मणियार यांनी दिलेल्या माहितीनुसार, तेव्हा मोदी म्हणाले, सुप्रिया आणि आम्ही देश सांभाळू, तुम्ही तब्येतीची काळजी घ्या. त्यावर, तुम्ही सर्वजण असल्यावर मला देशाची चिंता नाही, असे म्हणत पवार यांनी मोदींचे आभार मानले. मोदींनी सुप्रिया सुळे यांच्याबद्दल केलेल्या या वक्तव्यामुळे आणि राष्ट्रवादीतील सध्याच्या घडामोडींमुळे व्हिडिओला विशेष महत्त्व आले आहे.

भेटीनंतर पटेल यांनी माध्यमांशी बोलताना सांगितले की, ते पवार यांच्या तब्येतीची माहिती घेण्यासाठी आले होते. पवार यांची तब्येत अतिशय चांगली आहे, असे त्यांनी सांगितले. पवार यांना थकवा जाणवत होता म्हणून ते रुबी रुग्णालयात गेले होते आणि पूर्ण चेकअपसाठी आता ब्रीच कँडीमध्ये आले आहेत, अशी माहितीही पटेल यांनी दिली.

पटेल म्हणाले की, साहेब हसत होते आणि राजकारणात काय सुरू आहे, हे विचारत होते. आमची राजकीय भूमिका काहीही असो, व्यक्तिगत प्रेम आहे, असे पटेल यांनी सांगितले. राजकीय भूमिका दुरावली होती, पण आपण पवार साहेबांना भेटत असतो आणि आमचे पारिवारिक संबंध आहेत, असेही ते म्हणाले.

हॉस्पिटलमध्ये इतर चर्चा करणे योग्य नाही, असे सांगत पटेल यांनी स्पष्ट केले की, पवार यांनी फक्त राजकारणात काय सुरू आहे, हे जनरल स्वरूपात विचारले. देशात आणि राज्यात काय चालले आहे, हे त्यांनी विचारले आणि अमेरिकेबद्दलही विचारले, असे पटेल यांनी सांगितले.