राज्यातील सर्व माध्यमांच्या शाळांमध्ये स्काऊट-गाईड बंधनकारक, मंत्री दादा भुसे यांचे निर्देश

राज्यातील सर्व माध्यमांच्या शाळांमधील विद्यार्थ्यांना आता स्काऊट-गाईडचे प्रशिक्षण घेणे बंधनकारक होणार आहे. शालेय शिक्षण मंत्री दादा भुसे यांनी याबाबत निर्देश दिले आहेत. भुसे यांच्या अध्यक्षतेखाली झालेल्या बैठकीत हा निर्णय घेण्यात आला आणि त्यानुसार सर्व शाळांमध्ये स्काऊट-गाईडचा विस्तार केला जाणार आहे.

राज्यातील सर्व माध्यमांच्या १ लाख ८ हजार शाळांमध्ये सुमारे २ कोटी १० लाख विद्यार्थी आहेत. या सगळ्यांना स्काऊट-गाईडचे प्रशिक्षण बंधनकारक करण्याचे निर्देश देण्यात आले आहेत. सध्या मात्र राज्यातील ३० हजार शाळांमधील सुमारे १७ लाख ३३ हजार विद्यार्थ्यांनाच हे प्रशिक्षण दिले जाते. ही व्याप्ती राज्यातील सर्व माध्यमांच्या शाळांपर्यंत वाढवण्याचे निर्देश भुसे यांनी दिले.

'राष्ट्र प्रथम' ही संकल्पना केंद्रस्थानी ठेवून शालेय शिक्षण विभाग काम करत आहे. त्यामुळे सर्व शाळांमध्ये स्काऊट-गाईडचे शिक्षण असणे आवश्यक आहे, असे बैठकीत सांगण्यात आले. या उपक्रमांतर्गत परेड, संचलन आणि देशभक्तिपर गीतांवरील कवायत बंधनकारक करावी, असे भुसे यांनी सांगितले. तसेच 'आनंददायी शनिवार' या उपक्रमांतर्गत आठवड्यातून दोन तास 'राष्ट्र प्रथम' या संकल्पनेसाठी घ्यावेत, असे निर्देशही त्यांनी दिले.

प्रशिक्षणाच्या व्यवस्थेबद्दलही बैठकीत चर्चा झाली. स्काऊट-गाईड उपक्रमासाठी शाळांमधील शिक्षकांना तालुकास्तरावर सात दिवसांचे प्रशिक्षण द्यावे, असे भुसे यांनी सांगितले. जिल्हा परिषद शाळांमधील विद्यार्थ्यांचे शुल्क आणि प्रशिक्षकांचे मानधन शालेय शिक्षण विभागामार्फत दिले जाईल, असेही त्यांनी स्पष्ट केले.

पुरस्कारप्राप्त विद्यार्थ्यांना मिळणाऱ्या गुणांचा विषयही बैठकीत निघाला. सध्या राज्य पुरस्कारप्राप्त विद्यार्थ्यांना तीन, तर राष्ट्रपती पुरस्कारप्राप्त विद्यार्थ्यांना दहा गुण दिले जातात. या गुणांमध्ये वाढ करण्यासाठी प्रस्ताव तयार करण्याचे निर्देश भुसे यांनी अधिकाऱ्यांना दिले.

या बैठकीला प्रधान सचिव रणजीत सिंह देओल, शालेय शिक्षण आयुक्त सचिंद्रप्रताप सिंह (ऑनलाईन), एससीईआरटीचे संचालक मंगेश जोशी (ऑनलाईन), उपसचिव तुषार महाजन आणि स्काऊट-गाईडचे सहायक राज्य सचिव रमेश जाधव उपस्थित होते. त्यांच्यासह शालेय शिक्षण आणि क्रीडा विभागाचे संबंधित अधिकारीही बैठकीला हजर होते.