वाशिममध्ये दुष्काळसदृश स्थितीत जनावरांच्या चाऱ्यासाठी जिल्हाधिकाऱ्यांचे नियोजनाचे आदेश

वाशिम जिल्ह्यात दुष्काळसदृश परिस्थिती निर्माण झाली आहे. अशा वेळी जनावरांना चारा कमी पडू नये, यासाठी प्रभावी नियोजन करण्याचे निर्देश जिल्हाधिकारी योगेश कुंभेजकर यांनी दिले आहेत. रब्बी हंगामात चारा उत्पादन वाढवणे, वैरण बियाण्यांचे वाटप, वनक्षेत्रात चारा लागवड आणि गरजेनुसार चारा डेपो व चारा छावण्या सुरू करून जनावरांना चारा देणे, याला प्राधान्य द्यावे, असे त्यांनी सांगितले.

जिल्हा चाराटंचाई नियोजन आढावा सभेत ते बोलत होते. या सभेला मुख्य कार्यकारी अधिकारी अर्पित चौहान, अपर जिल्हाधिकारी ब्रिजेश पाटील, निवासी उपजिल्हाधिकारी विश्वनाथ घुगे, सहाय्यक वनसंरक्षक मंठावार, जिल्हा पशुसंवर्धन उपायुक्त डॉ. तुषार बावणे आणि जिल्हा आपत्ती व्यवस्थापन अधिकारी शाहू भगत हे प्रमुख अधिकारी उपस्थित होते.

जिल्हाधिकारी कुंभेजकर यांनी सांगितले की, जिल्हा पशुसंवर्धन उपायुक्तांनी सादर केलेल्या नियोजनानुसार २१ व्या पशुगणनेप्रमाणे जिल्ह्यात २ लाख ९१ हजार ८९५ पशुधन आहे. सप्टेंबर २०२६ अखेर १३ लाख २९ हजार १३८ मेट्रिक टन चारा उपलब्ध असून, हा साठा एप्रिल ते मे महिन्यापर्यंत पुरेल असे नियोजन आहे. चाऱ्याची उपलब्धता कायम राहावी, यासाठी आवश्यक त्या उपाययोजनांचे नियोजन करावे, असेही त्यांनी स्पष्ट केले.

रब्बी हंगामात चारा उत्पादन वाढवण्यासाठी वैरण बियाणे देता यावे म्हणून १ कोटी रुपयांच्या अतिरिक्त निधीची मागणी करण्यात आली आहे. विदर्भ-मराठवाडा दुग्धविकास प्रकल्पातून २० लाख रुपयांचे वैरण बियाणे वाटण्याचा प्रस्ताव आहे. सिंचनाची जमीन आणि पुरेसा पाणीसाठा असलेल्या ६४४ शेतकऱ्यांची यादीही तयार झाली आहे.

चालू २०२६-२७ वर्षात ५१.७ लाख रुपयांचा निधी मिळाला आहे. त्यातून १ हजार ८१४ लाभार्थ्यांना १३ हजार ४४८ किलो वैरण बियाण्यांचे वाटप झाले आहे. यामुळे ७२५ हेक्टर क्षेत्रावर चारा लागवड होईल आणि २४ हजार ६६४ मेट्रिक टन चारा उत्पादन होईल, अशी अपेक्षा आहे.

उपलब्ध योजनांचा प्रभावी वापर करावा आणि वनक्षेत्रात चारा लागवडीवर अधिक भर द्यावा, असेही जिल्हाधिकाऱ्यांनी सांगितले. ई-क्लास जमिनीवर चारा लागवडीसाठी पशुसंवर्धन विभागाने व्हीबी-जी रामजी योजनेअंतर्गत प्रस्ताव सादर करावेत. वन विभागाने कुरण क्षेत्रातील चारा पशुसंवर्धन विभागामार्फत जनावरांना उपलब्ध करून द्यावा, असेही सांगण्यात आले आहे.

याशिवाय ज्वारी व बाजरीसारख्या कमी पावसात वाढणाऱ्या चारा पिकांची लागवड, कुटाराची योग्य साठवण व प्रक्रिया आणि चारा साक्षरता अभियान २०२६ राबवण्यावरही भर दिला जात आहे. गरज पडली तर चारा डेपो व छावण्यांच्या माध्यमातून पशुधनाला चारा देण्याचे नियोजन करण्यात आले आहे.