व्हीएनआयटी नागपूरच्या १० प्राध्यापकांचा जगातील अव्वल २ टक्के शास्त्रज्ञांच्या यादीत समावेश

नागपूर : विश्वेश्वरय्या राष्ट्रीय तंत्रज्ञान संस्था म्हणजेच व्हीएनआयटी नागपूरमधील १० प्राध्यापकांचा सन २०२५ च्या जगातील अव्वल २ टक्के शास्त्रज्ञांच्या यादीत समावेश झाला आहे. अमेरिकेतील स्टॅनफर्ड विद्यापीठाने प्रसिद्ध केलेल्या प्रतिष्ठित क्रमवारीत या प्राध्यापकांची नावे आली असून, संस्थेला याचा अभिमान वाटत असल्याचे व्हीएनआयटीने जाहीर केले आहे.

वेगवेगळ्या विषयांत या प्राध्यापकांनी संशोधन, वैज्ञानिक नवकल्पना आणि शैक्षणिक गुणवत्तेच्या क्षेत्रात केलेल्या भरीव कामाची या यादीतून दखल घेतली गेली आहे. तांत्रिक शिक्षण आणि संशोधनात आघाडीची संस्था म्हणून आपले स्थान बळकट करणे, ज्ञानात भर घालणे आणि परिणामकारक संशोधनाला चालना देणे ही व्हीएनआयटी नागपूरची बांधिलकी या निवडीतून दिसते, असे संस्थेचे म्हणणे आहे.

यादीतील प्राध्यापकांची नावे आणि त्यांचे मुख्य विषय असे आहेत. उपसंचालक प्रा. बाबासाहेब रघुनाथ सानकपाल यांचा विषय मटेरियल्स असून ते फिजिक्स विभागात आहेत. प्रा. कैलास लच्छुराम वासेवार केमिकल इंजिनिअरिंग विभागात असून त्यांचे संशोधन क्षेत्र केमिकल इंजिनिअरिंग आहे. प्रा. मकरंद सुधाकर बल्लाळ इलेक्ट्रिकल इंजिनिअरिंग विभागात असून त्यांचे क्षेत्र इलेक्ट्रिकल आणि इलेक्ट्रॉनिक इंजिनिअरिंग आहे. प्रा. सचिन ए. मांडवगणे आणि प्रा. एस. एस. सोनवणे हे दोघेही केमिकल इंजिनिअरिंग विभागातले असून त्यांचेही क्षेत्र केमिकल इंजिनिअरिंगच आहे.

प्रा. अंजन पटेल हे सिव्हिल इंजिनिअरिंग विभागात असून त्यांचे संशोधन जिऑलॉजिकल आणि जिओमॅटिक्स इंजिनिअरिंगमध्ये आहे. प्रा. मनमोहन दास गोयल यांचा विषय मटेरियल्स असून ते अप्लाइड मेकॅनिक्स विभागात आहेत. डॉ. प्रदीप रौल हे गणित विभागातले असून ते न्यूमेरिकल आणि कॉम्प्युटेशनल मॅथेमॅटिक्समध्ये संशोधन करतात. डॉ. सुकांता रोगा मेकॅनिकल इंजिनिअरिंग विभागात असून त्यांचे क्षेत्र ऊर्जा आहे. डॉ. अरविंद कुमार हे इलेक्ट्रॉनिक्स अँड कम्युनिकेशन इंजिनिअरिंग विभागात असून नेटवर्किंग आणि टेलिकम्युनिकेशन्स हे त्यांचे क्षेत्र आहे.

या यशामुळे संस्थेतील मजबूत संशोधन संस्कृती आणि प्राध्यापकांची वैज्ञानिक प्रगती व विद्वत्तापूर्ण गुणवत्तेसाठीची निष्ठा अधोरेखित होते, असे व्हीएनआयटीने म्हटले आहे. या प्राध्यापकांच्या कामामुळे संस्थेची शैक्षणिक प्रतिष्ठा वाढत असून, आजच्या वैज्ञानिक आणि तांत्रिक आव्हानांना तोंड देण्यातली संस्थेची भूमिकाही अधिक भक्कम होत आहे.

या उल्लेखनीय यशाबद्दल व्हीएनआयटी नागपूरने सर्व सन्मानित प्राध्यापकांचे अभिनंदन केले असून, त्यांच्या संशोधन कार्याला यापुढेही यश मिळो, अशा शुभेच्छा दिल्या आहेत.