मुंबईत पाळीव प्राण्यांच्या देखभालीचे प्रशिक्षण देणारी संस्था उभारण्यासाठी लोढा यांचा पुढाकार

कौशल्य विकास विभागाचे मंत्री मंगलप्रभात लोढा यांनी मुंबईत पेटकेअर शिक्षण व प्रशिक्षण संस्था सुरू करण्यासाठी पुढाकार घेतला आहे. पुण्यात नुकतीच पेटकेअर एज्युकेशन अँड ट्रेनिंग संस्था सुरू करण्यात आली असून, त्याच धर्तीवर मुंबईतही अशी संस्था असावी, अशी त्यांची भूमिका आहे.

याशिवाय राज्यातील औद्योगिक प्रशिक्षण संस्थांमध्ये, म्हणजे आयटीआयमध्ये, पेटकेअरशी संबंधित विशेष अभ्यासक्रम सुरू करण्याचाही आपला मानस असल्याचे लोढा यांनी सांगितले.

मुंबईतील संस्थेबाबत प्राणीप्रेमी आणि नागरिकांकडून सूचना व हरकती मागवल्या जात आहेत. त्यासाठी लोढा यांच्या अधिकृत समाजमाध्यम खात्यांवर गूगल फॉर्मची लिंक उपलब्ध करून देण्यात आली आहे. त्या लिंकवर जाऊन नागरिकांनी आपली मते, सूचना व हरकती नोंदवाव्यात, असे आवाहन त्यांनी केले आहे.

लोढा म्हणाले की, पेटकेअर एज्युकेशन अँड ट्रेनिंग (PETE) या उपक्रमातून पाळीव प्राण्यांची काळजी, आरोग्य, सुरक्षितता आणि कल्याण यांना प्राधान्य दिले जाईल. त्यासाठी आधुनिक, शास्त्रीय आणि नैतिक पद्धतींचे प्रशिक्षण दिले जाणार आहे.

पेटकेअर क्षेत्रात करिअर करू इच्छिणारे युवक-युवती, या क्षेत्रात आधीपासून काम करणारे व्यावसायिक आणि पाळीव प्राण्यांचा सांभाळ करणारे नागरिक, अशा सर्वांसाठी विविध मान्यताप्राप्त प्रमाणपत्र अभ्यासक्रम उपलब्ध करून देण्याचे नियोजन आहे.

या प्रशिक्षणात पेट हँडलिंग, डॉग वॉकिंग, पेट सिटिंग, पेट ग्रूमिंग आणि पाळीव प्राण्यांसाठी निवास व देखभाल सुविधा व्यवस्थापन अशा विविध विषयांचा समावेश असेल. प्रात्यक्षिक प्रशिक्षणावर विशेष भर दिला जाणार असून, आधुनिक सुविधांमध्ये प्रत्यक्ष अनुभवातून विद्यार्थ्यांना कौशल्ये आत्मसात करता येतील. तसेच पेट पॅरेंट्ससाठी पाळीव प्राण्यांचे आरोग्य, संगोपन आणि कल्याण याविषयी माहिती देणारे ऑनलाइन अभ्यासक्रमही उपलब्ध करून देण्याचे नियोजन आहे.

PETE हा पाळीव प्राण्यांची देखभाल आणि प्राणी कल्याण या क्षेत्रातील एक महत्त्वपूर्ण उपक्रम आहे. यातून पाळीव प्राण्यांना जागतिक दर्जाच्या सेवा आणि योग्य काळजी मिळण्यासाठी आवश्यक असलेले कुशल मनुष्यबळ तयार होण्यास मदत होईल. तसेच या क्षेत्रात रोजगार आणि स्वयंरोजगाराच्या नव्या संधी निर्माण होण्यास चालना मिळेल.

पाळीव प्राण्यांचे जीवनमान उंचावणे आणि त्यांची काळजी घेणाऱ्या व्यक्तींची कौशल्ये व व्यावसायिक क्षमता विकसित करणे, हा या उपक्रमाचा मुख्य उद्देश आहे. मुंबईत अशी संस्था सुरू करण्याच्या दृष्टीने प्राणीप्रेमी आणि नागरिकांच्या सूचना व अपेक्षा जाणून घेतल्या जातील आणि त्यानंतर पुढील नियोजन केले जाईल, असे मंत्री लोढा यांनी स्पष्ट केले.