बाणगंगा तलावात मृत माशांचा खच, मंत्री लोढा यांनी पाहणी करून महापालिकेला दिल्या सूचना

वाळकेश्वर येथील बाणगंगा तलावात दूषित पाण्यामुळे मासे मरून पडल्याचे समोर आले आहे. कॅबिनेट मंत्री मंगलप्रभात लोढा यांनी तलावाला भेट देऊन मृत माशांचा खच आणि एकूण परिस्थितीची पाहणी केली. या तलावाला ऐतिहासिक आणि पौराणिक महत्त्व आहे.

पाहणीच्या वेळी महापालिकेच्या डी विभागाचे सहाय्यक आयुक्त संतोष साळुंखे आणि स्थानिक नगरसेवक सन्नी सानप उपस्थित होते. पितृपक्षाच्या पार्श्वभूमीवर तलावाचे पावित्र्य आणि पर्यावरणाचे संवर्धन जपण्यासाठी आवश्यक त्या उपाययोजनांवर भर दिला जाईल, असे लोढा यांनी सांगितले.

पंतप्रधान नरेंद्र मोदी यांच्या वाढदिवसानिमित्त देशभरात 'सेवा संकल्प अभियान' राबवले जात आहे. त्या अभियानांतर्गत वॉर्डमधील प्रमुख पदाधिकारी आणि कार्यकर्त्यांनी बाणगंगा तलाव परिसरात स्वच्छता मोहीम राबवली होती. पितृपक्षात पिंडदानासह वेगवेगळे धार्मिक विधी करण्यासाठी इथे हजारो नागरिक येतात. या विधींमध्ये वापरले जाणारे काही पदार्थ तलावाच्या पाण्यात सोडले जातात. त्यामुळे पाण्याच्या गुणवत्तेवर परिणाम होण्याची शक्यता आहे आणि जलजीवनावरही वाईट परिणाम होत असल्याचे निदर्शनास आले आहे. म्हणूनच पर्यावरण संवर्धनाच्या दृष्टीने तलाव परिसरात तातडीने स्वच्छता मोहीम घेण्यात आली.

गेल्या गुरुवारी महापालिकेच्या वॉर्ड अधिकाऱ्यांसोबत तलाव परिसराची प्रत्यक्ष पाहणी करण्यात आली होती. पितृपक्षात वाढणारी गर्दी लक्षात घेता, धार्मिक विधींमधील साहित्य तलावात किंवा परिसरात टाकले जाऊ नये, यासाठी आवश्यक खबरदारी घेण्याच्या सूचना महापालिकेला देण्यात आल्या आहेत.

स्वच्छता, कचरा व्यवस्थापन आणि जलजीवनाचे संरक्षण यासाठी महापालिकेने योग्य त्या उपाययोजना त्वरित कराव्यात, असे लोढा यांनी सांगितले. १० कृत्रिम तलाव तयार केले जातील. दूषित पाण्यात ऑक्सिजन पुरवण्यासाठी पंपांची संख्या वाढवली जाणार आहे. येत्या शनिवारी पितृपक्षाचा कालावधी संपणार आहे. या काळात तलाव परिसरात मोठी गर्दी होते. त्यामुळे पितृपक्षाच्या उरलेल्या दिवसांत आणि त्यानंतरही परिसरात स्वच्छता राहावी, यासाठी महापालिकेने आवश्यक ती खबरदारी घ्यावी, अशा सूचना लोढा यांनी दिल्या.

पिंडदानाच्या वेळी वापरले जाणारे काही पदार्थ तलावात सोडले जातात. हे पदार्थ जलजीवांनी खाल्ले तर त्यांच्या आरोग्यावर परिणाम होण्याची शक्यता असते. म्हणून धार्मिक परंपरा जपतानाच बाणगंगा तलावात पर्यावरणपूरक पद्धतीने पिंडदानाचे विधी करावेत, असे आवाहन करण्यात आले आहे.

नागरिकांनी सहकार्य करावे, असे लोढा यांनी म्हटले आहे. पूर्वजांचे स्मरण आणि धार्मिक परंपरा जपत असतानाच पर्यावरणाचे संवर्धन करणे ही आपली सामूहिक जबाबदारी आहे. तलावातील जलजीवनाचे संरक्षण व्हावे, यासाठी पाण्यात तेल, तूप, गोड पदार्थ किंवा इतर साहित्य टाकणे टाळावे. बाणगंगेचे पावित्र्य, स्वच्छता आणि पर्यावरण जपण्यासाठी प्रशासनासोबत नागरिकांनीही सहकार्य करावे, असे मंगलप्रभात लोढा, कॅबिनेट मंत्री यांनी म्हटले आहे.