नागपूर जिल्हा परिषदेच्या शाळांच्या इमारती जीर्ण, ५८८ वर्गखोल्यांची तातडीने पुनर्बांधणी करण्याची गरज

नागपूर जिल्ह्यातील जिल्हा परिषदेच्या शाळा डिजिटल करण्याचे आणि संगणकीकृत ग्रंथालयासारख्या सुविधा देण्याचे काम सुरू आहे. मात्र दुसरीकडे अनेक शाळा इमारतींतील वर्गखोल्या जीर्ण अवस्थेत असल्याचेही समोर आले आहे. एकीकडे आधुनिक सुविधांचे काम चालू असताना दुसरीकडे इमारतींची ही स्थिती चिंता वाढवणारी ठरली आहे.

जिल्ह्यातील जिल्हा परिषद शाळांच्या सर्वेक्षणात एकूण १,४६१ वर्गखोल्यांपैकी ५८८ वर्गखोल्यांची तातडीने पुनर्बांधणी करण्याची गरज दिसून आली. याशिवाय ८७३ वर्गखोल्यांची तातडीने दुरुस्ती करावी लागणार आहे.

काही ठिकाणी शौचालयांची स्थिती अतिशय वाईट आहे. सर्वेक्षणात ३०७ शौचालयांची स्थिती खराब आढळली. त्यामुळे या शाळांत शिकणाऱ्या विद्यार्थ्यांच्या सुरक्षेचा आणि आरोग्याचा प्रश्न उभा राहिला आहे.

नागपूर जिल्हा परिषदेच्या अखत्यारीत १,५०९ शाळा आहेत. या शाळांतील एकूण ५,१७१ वर्गखोल्यांचे सर्वेक्षण करण्यात आले. त्यापैकी ३,७१० वर्गखोल्या चांगल्या स्थितीत आढळल्या. मात्र ८७३ वर्गखोल्यांत मोठ्या प्रमाणावर दुरुस्तीची, तर ५८८ वर्गखोल्यांत तातडीच्या उपाययोजनांची गरज असल्याचे स्पष्ट झाले.

कुठे छतातून पाणी गळते, कुठे भिंतींना ओल आलेली आहे आणि भेगाही पडलेल्या आहेत. या सुधारणांसाठी तातडीने पुरेशा निधीची गरजही आहे.

विभागाकडून मिळालेल्या माहितीनुसार, शंभरपेक्षा जास्त विद्यार्थी असलेल्या १२८ शाळांतील ३५० वर्गखोल्यांच्या दुरुस्तीचे काम सध्या सुरू आहे. जास्त विद्यार्थीसंख्या असलेल्या शाळांना प्राधान्य देऊन ही कामे केली जात आहेत. याशिवाय अत्यंत गरज असलेल्या १६६ शाळांतील दुरुस्तीचे काम आर्थिक वर्ष २०२६-२७ मध्ये करण्याचे नियोजन आहे. उर्वरित काम आर्थिक वर्ष २०२७-२८ आणि २०२८-२९ मध्ये पूर्ण करण्याचे लक्ष्य ठेवण्यात आले आहे.

दरम्यान, नागपूर जिल्हा परिषदेचे मुख्य कार्यकारी अधिकारी विनायक महामुनी यांनी 'मिशन संजीवनी'अंतर्गत जिल्ह्यातील २०० शाळांचा कायापालट करण्याचा निर्णय घेतला आहे. या उपक्रमात शाळांमध्ये आवश्यक दुरुस्ती, रंगरंगोटी आणि मूलभूत सुविधांत सुधारणा केली जाईल. विद्यार्थ्यांना सुरक्षित, स्वच्छ आणि आकर्षक शैक्षणिक वातावरण मिळावे, हा त्यामागचा उद्देश आहे.

शाळा इमारतींची जीर्ण अवस्था आणि मूलभूत सुविधांचा अभाव यामुळे विद्यार्थ्यांना सुरक्षित आणि निरोगी वातावरणात शिक्षण मिळते का, असा प्रश्न उपस्थित होत आहे.