आचार्य पदवी संशोधनासाठी पात्रता पेट परीक्षा घ्या, गोंडवाना विद्यापीठ यंग टीचर संघटनेची कुलगुरूंकडे मागणी

गोंडवाना विद्यापीठ यंग टीचर संघटनेच्या वतीने विद्यापीठाचे कुलगुरू डॉ. प्रशांत बोकारे यांना निवेदन देण्यात आले. आचार्य पदवीच्या संशोधनासाठी पात्रता म्हणून पेट (PET) परीक्षा घेण्यात यावी, अशी या निवेदनातील मागणी आहे. या वेळी संघटनेचे अध्यक्ष डॉ. संजय गोरे, सचिव डॉ. विवेक गोर्लावार, उपाध्यक्ष डॉ. विजय वाढई तसेच ज्येष्ठ पदाधिकारी डॉ. रामदास कामडी, डॉ. अक्षय धोटे, डॉ. राहुल सावलीकर यांच्यासह इतर पदाधिकारी प्रामुख्याने उपस्थित होते. पेट परीक्षेचे परिपत्रक तात्काळ काढण्याचे आश्वासन कुलगुरूंनी या वेळी संघटनेच्या पदाधिकाऱ्यांना दिले.

संघटनेने याआधीही आचार्य पदवीच्या संशोधनासाठी पात्रता पेट परीक्षा घेण्याबाबत अनेक निवेदने दिली आहेत. मात्र त्या निवेदनांवर प्रशासनाकडून कोणतीही ठोस कार्यवाही झाल्याचे दिसत नाही. म्हणून हा प्रश्न सोडवण्यासाठी संघटनेने पुन्हा एकदा निवेदन दिले आणि पेट परीक्षेबाबतची आपली भूमिका कुलगुरूंना समजावून सांगितली.

संघटनेने कुलगुरूंच्या निदर्शनास आणून दिले की, आचार्य पदवीसाठी प्रवेश पात्रता परीक्षा म्हणून मुंबई विद्यापीठ (मुंबई), सावित्रीबाई फुले पुणे विद्यापीठ (पुणे), रा.तु.म. नागपूर विद्यापीठ (नागपूर) आणि संत गाडगे महाराज अमरावती विद्यापीठ (अमरावती) अशी अनेक नामांकित विद्यापीठे पेट परीक्षा घेत आहेत आणि त्यातून विद्यार्थ्यांना संशोधनाची संधी देत आहेत. गोंडवाना विद्यापीठाने मात्र सप्टेंबर 2023 पासून पेट पात्रता परीक्षा घेणे बंद केले आहे. त्यामुळे ग्रामीण आणि आदिवासीबहुल भागातील गरीब, होतकरू विद्यार्थ्यांच्या संशोधनाची दारे बंद झाली आहेत, असे संघटनेने कुलगुरूंना सांगितले.

विशेष म्हणजे, गोंडवाना विद्यापीठाच्या विद्या परिषद, अधिसभा आणि व्यवस्थापन परिषदेच्या सभेत पेट परीक्षा घेण्याबाबत यापूर्वी सविस्तर चर्चा होऊन त्याला मान्यताही देण्यात आली आहे. तरीही अनेक महिने उलटून गेले असताना विद्यापीठाने ही परीक्षा घेण्याबाबतचे परिपत्रक काढलेले नाही. त्यामुळे गोंडवाना विद्यापीठ पेट परीक्षा घेण्याबाबत उदासीन असून ग्रामीण आणि आदिवासीबहुल भागातील गरीब, होतकरू विद्यार्थ्यांना संशोधनापासून वंचित ठेवत आहे, अशी धारणा समाजात होत आहे.

अशा स्थितीत संवैधानिक मार्गाने आंदोलन करून न्याय मागितल्याशिवाय पर्याय राहणार नाही, अशी भूमिका संघटनेने घेतली आहे. आचार्य पदवीसाठी प्रवेश पात्रता परीक्षा म्हणून पेट परीक्षा घेण्यासाठी तातडीने कार्यवाही करावी, त्याबाबतचे परिपत्रक लवकरात लवकर काढावे आणि विद्यार्थ्यांना आचार्य पदवी मिळवण्याची संधी उपलब्ध करून द्यावी, अशी मागणी संघटनेच्या वतीने करण्यात आली आहे.