दिवाळीत नागपूर-पुणे मार्गावर एमएसआरटीसीच्या जादा बस, खासगी ट्रॅव्हल्सच्या मनमानीतून दिलासा

दिवाळीच्या निमित्ताने आपल्या घरी आणि मूळ गावी जाणाऱ्या सामान्य प्रवाशांसाठी एक मोठा दिलासा देणारी बातमी आहे. महाराष्ट्र राज्य मार्ग परिवहन महामंडळाच्या नागपूर विभागाने नागपूर-पुणे (चिंचवड बस स्टँड)-नागपूर या मार्गावर जादा साध्या बस सोडण्याचा महत्त्वाचा निर्णय घेतला आहे.

दिवाळी हा वर्षातील सर्वात मोठा सण असल्याने या काळात प्रवाशांची खूप गर्दी असते. या गर्दीचा फायदा घेऊन खासगी बस ट्रॅव्हल्स एजन्सी मनमानी भाडे घेतात. प्रवाशांवर पडणारा हा जादा आर्थिक बोजा टाळणे, त्यांचा वेळ वाचवणे आणि त्यांचा प्रवास सोयीचा व सुरक्षित करणे, यासाठी महामंडळाच्या नागपूर विभागाने कंबर कसली आहे.

नागपूरच्या गणेशपेठ बस स्टँडवरून पुण्याच्या चिंचवड बस स्टँडपर्यंत या जादा साध्या बस 2 नोव्हेंबर ते 7 नोव्हेंबर या काळात धावतील. परतीसाठी पुण्याच्या चिंचवड बस स्टँडवरून नागपूरला जाणाऱ्या जादा बस 4 नोव्हेंबर ते 7 नोव्हेंबरपर्यंत सोडल्या जातील.

नागपूरहून पुण्याला जाणाऱ्या बस सकाळी 9, 10 आणि 11 वाजता तसेच दुपारी 12, 1 आणि 2 वाजता सुटतील. पुण्याहून नागपूरला येणाऱ्या बस संध्याकाळी 5.30 आणि 6.30 वाजता, तसेच रात्री 7, 7.30, 8 आणि 8.30 वाजता रवाना होतील.

या विशेष बसमधील सीटचे आरक्षण ठरलेल्या तारखांनुसार उपलब्ध करून दिले आहे. प्रवासी घरबसल्या सहज https://npublic.msrtcors.com या वेबसाइटवरून किंवा MSRTCN या मोबाइल अॅपवरून आपल्या सीटचे ऑनलाइन बुकिंग करू शकतात. दिलेल्या बस पूर्ण भरल्या (हाउसफुल झाल्या) तर प्रवाशांच्या सोयीसाठी लगेच आणखी साध्या बस आरक्षणासाठी उपलब्ध करून दिल्या जातील, असे महामंडळाने स्पष्ट केले आहे.

नागपूर-पुणे मार्गाशिवाय नागपूर विभागातील इतर प्रमुख मार्गांवरही प्रवाशांचा प्रतिसाद आणि मागणी पाहून जादा बस सोडण्याची योजना आहे. यात नागपूर-माहूर, नागपूर-गडचिरोली, नागपूर-गोंदिया आणि नागपूर-राजुरा या मार्गांचा समावेश आहे. या मार्गांवरील प्रवाशांची ये-जा पाहून वेगवेगळ्या बस स्टँडवरून जादा साध्या बस सोडल्या जातील.

दर वर्षी दिवाळीत सीट कमी पडतात आणि त्याचा फायदा घेऊन खासगी ट्रॅव्हल्स बसचालक नेहमीच्या भाड्याच्या तीन ते चार पट भाडे घेतात. शिवाय या बस वेळेवर सुटत नाहीत, त्यामुळे प्रवाशांचा मौल्यवान वेळही वाया जातो. अशा वेळी एमएसआरटीसीने योग्य आणि नियंत्रित दरात पुरेशा बस उपलब्ध करून दिल्याने प्रवाशांची या आर्थिक पिळवणुकीतून मोठ्या प्रमाणात सुटका होईल.