अहिल्यानगर-जामखेड महामार्गावर भीषण अपघात; स्कॉर्पिओची तीन दुचाकींना धडक, दोघांचा जागीच मृत्यू

अहिल्यानगर-जामखेड महामार्गावर निंबोडी गावाजवळ हॉटेल उत्सवसमोर भीषण अपघात झाला. एका स्कॉर्पिओने तीन दुचाकींना जोरदार धडक दिली. या अपघातात दोघांचा जागीच मृत्यू झाला, तर एक जण गंभीर जखमी झाला आहे.

मृतांची नावे रोहिदास कडभने आणि बाप्पू पवार अशी आहेत. त्यापैकी रोहिदास कडभने हे सेवानिवृत्त सैनिक होते. गंभीर जखमी झालेले मयूर शिर्के यांना उपचारासाठी रुग्णालयात दाखल करण्यात आले आहे.

प्राथमिक माहितीनुसार, स्कॉर्पिओ अहिल्यानगरकडून जामखेडच्या दिशेने जात होती. निंबोडीजवळ समोरून येणाऱ्या तीन दुचाकींना तिने धडक दिली. धडक इतकी भीषण होती की, दुचाकी सुमारे ५० ते १०० फूट अंतरापर्यंत फरफटत गेल्या. दोघांना गंभीर दुखापत झाल्याने त्यांचा जागीच मृत्यू झाला.

अपघात झाल्यावर परिसरातील नागरिकांनी घटनास्थळी धाव घेतली आणि जखमीला रुग्णालयात हलवले.

स्कॉर्पिओचा टायर फुटल्याने चालकाचे गाडीवरील नियंत्रण सुटले, अशी प्राथमिक माहिती समोर आली आहे. मात्र अपघाताचे नेमके कारण अजून स्पष्ट झालेले नाही.

अपघातानंतर स्कॉर्पिओचा चालक गाडी घटनास्थळीच सोडून फरार झाला. घटनेची माहिती मिळताच कॅम्प पोलीस तिथे पोहोचले आणि त्यांनी पंचनामा केला. अपघातातील वाहने ताब्यात घेण्यात आली आहेत. पोलिसांनी अपघाताचा तपास सुरू केला असून फरार चालकाच्या शोधासाठी त्यांचे प्रयत्न सुरू आहेत.

या घटनेमुळे निंबोडी परिसरात हळहळ व्यक्त होत आहे. सेवानिवृत्त सैनिक रोहिदास कडभने आणि बाप्पू पवार यांचा जागीच मृत्यू झाल्याने परिसरात शोककळा पसरली आहे. महामार्गावरील वेगावर नियंत्रण आणि वाहनांची तांत्रिक स्थिती हा प्रश्न यानिमित्ताने पुन्हा ऐरणीवर आला आहे.