एसटी कर्मचाऱ्यांना दिवाळीपूर्वी मिळणार वेतन, परिवहन मंत्री प्रताप सरनाईक यांचे प्रशासनाला निर्देश

महाराष्ट्र राज्य मार्ग परिवहन महामंडळातील (ST) सुमारे 83 हजार अधिकारी आणि कर्मचाऱ्यांची दिवाळी गोड व्हावी, यासाठी परिवहन मंत्री प्रताप सरनाईक (Pratap Sarnaik) यांनी एसटी प्रशासनाला महत्त्वाचे निर्देश दिले आहेत. सरनाईक हे राज्याचे परिवहन मंत्री आहेत आणि एसटी महामंडळाचे अध्यक्षही आहेत. नोव्हेंबर महिन्याचे वेतन दिवाळीपूर्वी देण्याच्या दृष्टीने तातडीने कार्यवाही करावी, असे त्यांनी एसटी प्रशासनाला सांगितले आहे.

एसटीतील अधिकारी आणि कर्मचाऱ्यांचे वेतन दर महिन्याला साधारणतः 7 ते 10 तारखेदरम्यान दिले जाते. पण यंदा 6 नोव्हेंबरपासून दिवाळी सणाला सुरुवात होत आहे. त्यामुळे कर्मचाऱ्यांना सणाच्या आधीच पगार मिळणे गरजेचे आहे. दिवाळीसाठी कुटुंबासोबत खरेदी करता यावी, घरगुती खर्च भागवता यावेत आणि इतर नियोजन करता यावे, यासाठी कर्मचाऱ्यांच्या हातात वेळेवर पगार पडणे महत्त्वाचे आहे. ही गोष्ट लक्षात घेऊन मंत्री सरनाईक यांनी वेतनासाठी आवश्यक ती पावले उचलण्याच्या सूचना प्रशासनाला दिल्या आहेत.

दिवाळीपूर्वी वेतन देता यावे, यासाठी एसटी महामंडळाच्या अर्थ व नियोजन विभागाने तातडीने शासनाकडे पाठपुरावा करावा, असा आदेश देण्यात आला आहे. कर्मचाऱ्यांच्या वेतनासाठी लागणारे अनुदान मिळावे, तसेच मागील महिन्यातील विविध प्रवासी सवलत योजनांच्या प्रतिपूर्तीपोटी शासनाकडून मिळणारी प्रलंबित रक्कम वेळेवर मिळावी, यासाठी विशेष प्रयत्न करावेत, असेही निर्देश देण्यात आले आहेत.

महामंडळाच्या आर्थिक अडचणींमुळे कर्मचाऱ्यांच्या सणाच्या आनंदावर विरजण पडू नये, म्हणून प्रशासनाने या विषयाला सर्वोच्च प्राधान्य द्यावे, असे सरनाईक यांनी स्पष्ट केले. शासनाकडून लागणारा निधी मिळावा यासाठी समन्वय साधून वेतन वितरणाचे नियोजन करावे आणि दिवाळीपूर्वी कर्मचाऱ्यांना पगार मिळेल, याची दक्षता घ्यावी, असेही त्यांनी सांगितले.

परिवहन मंत्र्यांच्या या निर्णयानंतर एसटी कर्मचाऱ्यांना काही प्रमाणात का होईना, दिलासा मिळाला आहे. आता एसटीचा अर्थ व नियोजन विभाग यावर कसे काम करतो, हे पाहणे उत्सुकतेचे ठरणार आहे. कारण त्यांच्याच मंत्रालयाशी समन्वय साधल्यामुळे एसटी कर्मचाऱ्यांची दिवाळी गोड होणार आहे.