गव्हर्नर राजवटीवरून खैबर पख्तुनख्वात संघर्ष; पोलिसांच्या गोळीबारात पाच जण जखमी

पाकिस्तानच्या खैबर पख्तुनख्वा प्रांतात गव्हर्नर राजवट लागू करण्याच्या निर्णयावरून राजकीय वातावरण तापले आहे. या निर्णयाविरोधात नागरिक रस्त्यावर उतरले आणि आंदोलक व पोलीस यांच्यात जोरदार संघर्ष झाला. पोलिसांनी केलेल्या गोळीबारात पाच जण जखमी झाले आहेत.

तेहरीक ए तालिबान पाकिस्तानच्या (TTP) दहशतवाद्यांविरोधात कठोर कारवाई करण्यात स्थानिक सरकार अपयशी ठरल्याचा ठपका ठेवत हा निर्णय घेण्यात आला. या संघटनेविरुद्ध कठोर कारवाई करण्यात प्रांतीय सरकार अपयशी ठरत असल्याचा आरोप करण्यात आला आहे. याच पार्श्वभूमीवर प्रांतात गव्हर्नर राजवट लागू करण्यात आली. त्यामुळे राज्यातील राजकीय वातावरणात मोठी खळबळ उडाली असून स्थानिक सरकारच्या अधिकारांवरून चर्चा सुरू झाली आहे.

या निर्णयामुळे नाराज झालेल्या पाकिस्तानी नागरिकांनी आणि आंदोलकांनी रस्त्यावर उतरून निषेध व्यक्त केला. आंदोलनादरम्यान पोलीस आणि नागरिक यांच्यात जोरदार संघर्ष झाला. परिस्थिती नियंत्रणात आणण्यासाठी पोलिसांनी आंदोलकांवर गोळीबार केल्याचा आरोप आहे. या गोळीबारात किमान पाच जण जखमी झाले. या घटनेनंतर लगेचच परिसरात सन्नाटा आणि तणावाचे वातावरण निर्माण झाले असून सुरक्षा व्यवस्था अधिक कडक करण्यात आली आहे.

खैबर पख्तुनख्वा हा पाकिस्तानमधील दहशतवादी कारवायांनी प्रभावित असलेल्या प्रांतांपैकी एक आहे. कारण अफगाणिस्तानच्या सीमेलगत असलेल्या भागांमध्ये सुरक्षा दल आणि दहशतवादी संघटना यांच्यात वारंवार संघर्ष होत असतो. अधूनमधून गोळ्या मारल्या जातात आणि बॉम्बस्फोट होत असतात. तेहरीक ए तालिबान पाकिस्तानच्या लढाऊ गटांच्या कारवायांमुळे या प्रांतात सुरक्षेचा प्रश्न गंभीर बनला आहे.

या कारणांमुळे नागरिकांच्या झोपा उडाल्या आहेत. कधी कुठून गोळी येईल किंवा कधी कुठे वावरताना अचानक बॉम्ब फुटेल, हे माहीत नसते. दहशतवादावर नियंत्रण मिळवताना स्थानिक नागरिकांचा विश्वास संपादन करणे हे आता सरकारसमोरील मोठे आव्हान ठरणार आहे.

दरम्यान, पाकिस्तानमध्ये इतरत्रही सरकारविरोधात आंदोलने सुरू झाली आहेत. इमरान खान यांना तुरुंगातून सोडण्याची मागणी ही त्यातील प्रमुख मागणी आहे.

जगात इतरत्रही अशांतता आहे. मध्य पूर्वेत येमेनमध्ये सौदी, सौदी समर्थक येमेन सरकार आणि हुथी यांच्यात जोरदार हल्ले-प्रतिहल्ले सुरू आहेत. गाझा पट्टी आणि लेबनॉनमध्ये इस्रायलकडून हल्ले होत आहेत. रशिया आणि युक्रेन यांच्यातील युद्धाला जवळपास चार वर्षे झाली आहेत, तरी ते सुरूच आहे. अमेरिका आणि इराण यांच्यातही संघर्ष सुरू आहे. पॅरिसमध्ये विद्यार्थ्यांचे जोरदार आंदोलन सुरू आहे आणि भारतातही तरुणाई रस्त्यावर उतरत आहे.