घरच्या घरी बनवा थंडगार फालुदा, रेसिपी अगदी सोपी; लहान मुलंही होतील खुश

उष्ण वातावरणात सूर्य तापलेला असतो, तेव्हा थंडगार आणि गोड काहीतरी खावंसं वाटतं. अशा वेळी थंडगार पदार्थ मनाला खुश करून जातात, आणि फालुदा त्यातलाच एक. दुपारच्या वेळी किंवा जेवणानंतर तो खाता येतो. बाजारातला फालुदा तुम्हाला आवडत असेल, तर तो घरी बनवून बघा. दुपारी जेवणानंतर तुम्ही घरी फालुदा तयार करू शकता.

ही रेसिपी फार सोपी आहे. एकदा ही रेसिपी ट्राय केली की तुम्ही ही डिश पुन्हा पुन्हा घरी बनवून खाल. जेवणानंतर काहीतरी गोड म्हणूनही ही डिश घरी करता येते. चला, आधी यासाठी लागणारं साहित्य आणि मग कृती पाहू.

साहित्य असं लागेल: २ कप थंड दूध, २ चमचे सब्जाच्या बिया, १ कप फालुदा शेव, २ ते ३ चमचे गुलाब सिरप, २ स्कूप व्हॅनिला आइस्क्रीम, आवडीनुसार २ चमचे साखर आणि २ चमचे चिरलेले बदाम व पिस्ते. हवी असेल तर थोडी रबडीही घेऊ शकता, ती ऐच्छिक आहे.

सर्वात आधी सब्जाच्या बिया पाण्यात २० मिनिटे भिजत ठेवा. बिया फुगून मऊ झाल्या की त्यातलं अतिरिक्त पाणी काढून टाका. त्यानंतर गॅसवर दूध तापत ठेवा, त्यात साखर घाला आणि हलकं दूध आटेपर्यंत शिजवत ठेवा.

यानंतर दुधात रोझ सिरप घाला. दूध थंड झालं की ते काही तास फ्रिजमध्ये ठेवा. दुसरीकडे एका भांड्यात फालुदा शेवया आणि पाणी घालून त्या उकळून घ्या.

आता एक काचेचा ग्लास घ्या आणि आवडीनुसार फालुद्याचे थर लावा. ग्लासच्या तळाशी रोझ सिरप, रोझ क्रश आणि भिजवलेल्या सब्जाच्या बिया टाका. त्यावर फालुदा शेव आणि ड्रायफ्रुट्सचे तुकडे घाला.

मग ग्लासमध्ये थंड दूध हळूहळू ओता. त्यामुळे फालुद्याला छान गुलाबी रंग आणि गोड चव येईल. दुधाच्या वर व्हॅनिला आइस्क्रीमचा स्कूप ठेवा. अधिक रिच चव हवी असेल तर थोडी रबडीही घालता येते. शेवटी फालुदा लगेच थंडगार खाण्यासाठी सर्व्ह करा.