कल्याण-डोंबिवलीत पाण्याची नासाडी थांबवण्यासाठी मनसेची वॉटर ऑडिटची मागणी

कल्याण-डोंबिवली महापालिका क्षेत्रात सध्या पाण्याची टंचाई आहे. नागरिकांना पाणी जपून वापरा, असे सांगितले जात आहे. पण त्याच वेळी जे पाणी वाया जात आहे ते थांबवण्यासाठी प्रशासनाने ठोस पावले उचलावीत, अशी मागणी महाराष्ट्र नवनिर्माण सेनेने केली आहे.

टंचाईमुळे महापालिका क्षेत्रात पाणी कपातीचे निबंध लागू करण्यात आले आहेत. मात्र शहरात अनेक ठिकाणी अनधिकृत नळजोडण्या आहेत, जलवाहिन्यांमधून गळती होत आहे आणि व्यावसायिक तसेच आस्थापनांकडून अनधिकृतपणे पाणी वापरले जात आहे. त्यामुळे मोठ्या प्रमाणात पाणी वाया जात असल्याचा मुद्दा मनसेने मांडला आहे.

मनसेचे डोंबिवली शहराध्यक्ष आणि माजी नगरसेवक हर्षद हरिश्चंद्र पाटील यांनी यासंदर्भात महापालिका आयुक्तांना निवेदन दिले. या नासाडीवर कठोर कारवाई करावी आणि संपूर्ण महापालिका क्षेत्राचे वॉटर ऑडिट करावे, असे त्यांनी निवेदनात म्हटले आहे. सर्वसामान्य नागरिकांना पाणी जपून वापरायला सांगितले जात असेल, तर अनधिकृतपणे पाणी वापरणाऱ्यांवरही कठोर कारवाई होणे गरजेचे आहे, असे ते म्हणाले.

पाटील यांच्या मागण्यांमध्ये कार वॉशिंग सेंटर, सर्व्हिस सेंटर आणि इतर व्यावसायिक आस्थापनांची तातडीने तपासणी करण्याचा समावेश आहे. तिथे पाण्याचा वापर नियमांप्रमाणे होतोय की नाही, हे पाहावे, असे त्यांनी सांगितले. महापालिका क्षेत्रातील जलवाहिन्यांवर बेकायदा घेतलेल्या नळजोडण्या शोधून त्या लगेच तोडाव्यात, अशीही त्यांची मागणी आहे. शिवाय मुख्य जलवाहिन्या आणि वितरण वाहिन्यांमधील गळती शोधून ती दुरुस्त करावी, असेही त्यांनी म्हटले आहे. असे केल्यास पाण्याची नासाडी कमी होईल आणि जे पाणी उपलब्ध आहे त्याचा अधिक चांगला उपयोग करता येईल, असे निवेदनात नमूद आहे.

पाणी ही नागरिकांची मूलभूत गरज आहे, असे हर्षद पाटील यांनी स्पष्ट केले. फक्त नागरिकांवर पाणी कपातीचे निबंध लादून भागणार नाही. अनधिकृत पाणीवापर रोखणे, गळती दुरुस्त करणे आणि पाण्याचे न्याय्य वाटप करणे ही प्रशासनाचीही जबाबदारी आहे, असे ते म्हणाले.

महापालिका प्रशासनाने या मागण्यांची लगेच दखल घ्यावी, अनधिकृतपणे पाणी वापरणाऱ्यांवर दंडात्मक कारवाई करावी आणि वॉटर ऑडिटचा अहवाल सार्वजनिक करावा, अशी मनसेच्या वतीने मागणी करण्यात आली आहे. दरम्यान, पाणी समस्येवरून नुकताच स्थानिक नागरिकांनी एमआयडीसी कार्यालयावर मोर्चा काढून जाब विचारला होता. काम सरकारी नियोजनानुसार सुरू आहे आणि पाण्याची टंचाई आहे ही खरी गोष्ट आहे, असे सांगण्यात आले.