जरांगे पाटलांच्या टीकेनंतर बीडमध्ये शिंदे समर्थनार्थ बॅनर, कामांचा हिशोब मांडला

बीड शहरात सध्या एका बॅनरची चर्चा आहे. मराठा आंदोलक मनोज जरांगे पाटील यांनी दसरा मेळाव्यात उपमुख्यमंत्री एकनाथ शिंदे यांच्यावर थेट टीका केली होती. त्याचे पडसाद आता बीडमध्ये उमटले आहेत. "शिंदे साहेब तुमचं जरा चुकलंच..." असा उपरोधात्मक मजकूर असलेले बॅनर शहरात झळकले आहेत. शिंदे यांनी मराठा समाजासाठी केलेल्या कामांचा हिशोब या बॅनरवर मांडण्यात आला आहे.

मराठा आरक्षणाच्या मुद्द्यावरून राज्यात वातावरण तापलेले असतानाच हे बॅनर लागले आहेत. जरांगे पाटील यांच्या आक्रमक टीकेनंतर त्यांना उद्देशून आणि मुख्यमंत्र्यांच्या समर्थनार्थ ते लावण्यात आले आहेत. राज्यभरातील राजकीय वर्तुळात त्याची जोरदार चर्चा सुरू आहे.

बीड शहरातील मुख्य चौकात लावलेल्या या बॅनरवर शिंदे यांनी मराठा समाजासाठी केलेल्या कामांची यादीच दिली आहे. जरांगे पाटील यांना कळावे म्हणून हा हिशोब मांडल्याचा दावा बॅनरच्या माध्यमातून करण्यात आला आहे.

बॅनरवरील पहिला मुद्दा कुणबी प्रमाणपत्रांचा आहे. मराठवाड्यात गेल्या 40 वर्षांत केवळ 2019 कुणबी प्रमाणपत्रे मिळाली होती, तर शिंदे यांनी अवघ्या दोन वर्षांत तब्बल 3 लाख 50 हजार प्रमाणपत्रे दिली, असे त्यावर म्हटले आहे. दुसरा मुद्दा SEBC आरक्षणाचा आहे. मराठा समाजाला 10 टक्के स्वतंत्र SEBC आरक्षण दिले आणि त्याचा लाभ आज 3 लाख 50 हजार विद्यार्थ्यांनी घेतला, असाही दावा बॅनरवर आहे. दोन्ही मुद्द्यांच्या शेवटी "शिंदे साहेब तुमचं चुकलं!" अशी ओळ आहे.

बॅनरवरील उपरोधात्मक टोला असा आहे की, एवढे सगळे करूनही शिंदे साहेब, खरंच तुमचं चुकलंच, कारण चार राजकीय सर्टिफिकेटसाठी तुमचा बाजार उठवतो, ही भाषा ऐकावी लागत आहे.

काही दिवसांपूर्वी जरांगे पाटील यांनी आंदोलनादरम्यान शिंदे यांच्यावर अत्यंत कठोर शब्दांत टीका केली होती. "तुमचा बाजार उठवणार" अशा स्वरूपाची भाषा त्यांनी वापरली होती. त्याला प्रत्युत्तर म्हणून आणि शिंदे यांनी मराठा समाजासाठी घेतलेले निर्णय लोकांसमोर आणण्यासाठी शिंदे समर्थकांनी किंवा मराठा समाजातील एका गटाने हे बॅनर लावून उपरोधाने उत्तर दिले आहे.

शिंदे यांनी कोर्टात टिकणारे 10 टक्के आरक्षण दिले, कुणबी नोंदी शोधून प्रमाणपत्रे वाटपाची प्रक्रिया वेगाने राबवली आणि सारथी संस्थेच्या माध्यमातून विद्यार्थ्यांना मदत केली, असे बॅनरवर म्हटले आहे. एवढे असूनही त्यांच्यावर होणारी टीका अयोग्य आहे, असा सूर बॅनरमधून व्यक्त झाला आहे. आता या बॅनरबाजीवर जरांगे पाटील काय उत्तर देतात, याकडे सगळ्यांचे लक्ष लागले आहे.

बीडमधील नारायणगडावरील दसरा मेळाव्यात जरांगे पाटील यांनी मराठा आरक्षणासह विविध मुद्द्यांवर आपली भूमिका मांडली होती. त्यावेळी त्यांनी एकनाथ शिंदे आणि खासदार श्रीकांत शिंदे यांच्यावर सडकून टीका केली. जरांगे पाटील यांनी दावा केला की, दिल्लीत भाजपच्या काही नेत्यांमध्ये आपल्याला 500 कोटी रुपये मिळाल्याबद्दल चर्चा सुरू असल्याचे त्यांना समजले आहे. शिंदे यांनी भाजपकडून 500 कोटी रुपये घेऊन श्रीकांत शिंदे यांच्या माध्यमातून आपल्यापर्यंत पोहोचवल्याचे भाजप नेत्यांना सांगितले होते का, असा सवाल त्यांनी केला. "एकनाथ शिंदे साहेब, तुम्ही मला 500 कोटी रुपये दिले का?" असा थेट प्रश्न विचारून त्यांनी स्पष्ट उत्तर मागितले. आज संध्याकाळपर्यंत किंवा दुसऱ्या दिवशी सकाळपर्यंत उत्तर द्यावे, असे आव्हानही त्यांनी दिले.

याच मेळाव्यात जरांगे पाटील यांनी शेतकऱ्यांना हेक्टरी 1 लाख रुपये मदत, संपूर्ण कर्जमाफी आणि पीक विम्याची रक्कम यांसह 5 प्रमुख मागण्या सरकारसमोर मांडल्या.