रामदास कदमांच्या टीकेला प्रवीण दरेकरांचे उत्तर, ५०० कोटींच्या क्लिपवरून महायुतीत वाद

राज्यातल्या राजकारणाला आता वेगळंच वळण लागलेलं दिसत आहे. महायुतीतले नेते आधीपासूनच वेगवेगळ्या कारणांनी एकमेकांवर टीका करत होते. त्यात मनोज जरांगे पाटील यांनी सादर केलेल्या ऑडिओ क्लिपमुळे आणखी भर पडली आहे. जरांगे यांनी फोडलेल्या या ऑडिओ बॉम्बमुळे महायुतीतच पळापळ सुरू झाल्याचं चित्र आहे, आणि भाजप व शिवसेना शिंदेगट यांच्यात चांगलीच जुंपली आहे.

या ऑडिओ क्लिपनंतर शिवसेना नेते रामदास कदम यांनी भाजपवर सडकून टीका केली. त्यावर आता भाजपनेही पलटवार केला आहे. भाजप नेते प्रवीण दरेकर यांनी कदम यांना जोरदार उत्तर दिलं. "भाजपवर आरोप करायचे आणि त्याचवेळी महायुतीत राहायचं, हे चालणार नाही," अशा शब्दांत त्यांनी आपली नाराजी व्यक्त केली.

कदम यांच्या टीकेला उत्तर देताना दरेकर म्हणाले की, भाजपवर खालच्या पातळीवर आरोप होत असतील तर पक्ष गप्प बसणार नाही. "भाजपसोबत राहायचं आणि शिव्या घालायच्या, हे आम्ही खपवून घेणार नाही," असा स्पष्ट इशाराही त्यांनी दिला.

प्रसाद लाड आणि काळकुटे यांच्या फोटोंचा उल्लेख करत दरेकर यांनी राजकीय आरोप-प्रत्यारोपांवर प्रश्न उपस्थित केले. कोणी कोणाच्या सुपाऱ्या घेतल्या, यावरूनही त्यांनी कदम यांच्यावर टीका केली.

कथित ऑडिओ क्लिपमधल्या ५०० कोटींच्या व्यवहारावर बोलताना दरेकर यांनी चौकशी पूर्ण होऊ द्यावी, असं म्हटलं. एकनाथ शिंदे यांनी पैसे दिलेही नाहीत आणि घेतलेही नाहीत, अशी भूमिका मांडल्याचं त्यांनी सांगितलं. क्लिपमधल्या संभाषणावरून लगेच निष्कर्ष काढणं योग्य नाही, तपास यंत्रणांच्या चौकशीत सत्य समोर येईल, असं ते म्हणाले. चौकशीआधी महायुतीत तणाव निर्माण होईल अशी विधानं करणं टाळायला हवं, असंही त्यांनी स्पष्ट केलं.

"मला वाटलं म्हणून मुख्यमंत्री होत नसतो," या मुद्द्यावरही दरेकर बोलले. एकनाथ शिंदे पुन्हा मुख्यमंत्री व्हावेत, अशी त्यांच्या कार्यकर्त्यांची इच्छा असू शकते. मात्र मुख्यमंत्री कोण होणार, हे फक्त इच्छेवर नाही, तर राजकीय आकडेवारीवरही अवलंबून असतं, असं त्यांनी सांगितलं.

महायुतीतले प्रश्न माध्यमांसमोर मांडण्याऐवजी वरिष्ठ नेत्यांनी एकत्र बसून सोडवावेत, असं आवाहनही दरेकर यांनी केलं. युतीतल्या समन्वयासाठी व्यवस्था असताना सार्वजनिकरित्या आरोप-प्रत्यारोप करणं योग्य नाही, असं त्यांचं म्हणणं आहे.

शिंदे साहेब विरोधी पक्षात नाहीत, मग त्यांना घाबरण्याचं कारण काय, असा सवालही दरेकर यांनी विचारला. युतीतल्या नेत्यांनी एकमेकांशी समन्वय ठेवून वागायला हवं, असंही ते म्हणाले.

आता दरेकर यांच्या या उत्तराला रामदास कदम काय प्रत्युत्तर देतात आणि कथित ऑडिओ क्लिपच्या चौकशीत काय निष्पन्न होतं, याकडे राजकीय वर्तुळाचं लक्ष लागलं आहे.