सोड्डीत बंद ढाब्यात सिलिंडरचे स्फोट; १० मजूर कुटुंबांचे संसार जळाले, ४ दुचाकी खाक

मंगळवेढा तालुक्यातील सोड्डी परिसरात उमदी रस्त्यावर असलेल्या एका बंद ढाब्यात गॅस सिलिंडरचा भीषण स्फोट झाला. या ढाब्यात लातूर जिल्ह्यातील १० मजूर कुटुंबे राहत होती. स्फोटानंतर लागलेल्या आगीत त्यांचे संसारोपयोगी साहित्य जळून खाक झाले, तसेच चार दुचाकीही आगीत सापडल्या. सुदैवाने कोणतीही जीवितहानी झाली नाही. मात्र, गेल्या १५ वर्षांपासून रोजगारासाठी संघर्ष करणाऱ्या या कुटुंबांचा संसार पुन्हा एकदा उघड्यावर आला आहे.

ही कुटुंबे लातूर जिल्ह्यातील औसा तालुक्यातील निलंगा येथील आहेत. सोलापूर आणि सांगली जिल्ह्याच्या सीमेवरील मंगळवेढा तालुक्याच्या दक्षिण भागातील सोड्डी परिसरात द्राक्षबागांच्या छाटणीसाठी ते गेल्या १५ वर्षांपासून रोजगाराच्या शोधात राहत आहेत. जिथे मजुरीचे काम मिळेल तिथे जाऊन उदरनिर्वाह करणे, हाच त्यांच्या जगण्याचा आधार आहे. कामासाठी आल्यानंतर राहण्याची सोय म्हणून त्यांना एका बंद ढाब्यात राहावे लागत होते.

आज दुपारी हे कामगार छाटणीच्या कामासाठी तेथील माजी सरपंचांच्या शेतात गेले होते. त्याच वेळी त्यांच्या निवासाच्या ठिकाणी अचानक गॅसचा स्फोट झाला. परिसरात जवळपास सहा सिलिंडर असल्याने एकापाठोपाठ सहा मोठे आवाज झाल्याचे सांगण्यात आले. त्यामुळे आसपासच्या नागरिकांमध्ये भीतीचे वातावरण पसरले.

स्फोटानंतर आगीचे मोठे लोळ दिसू लागले. आग विझविण्यासाठी मदतीला जाण्याच्या तयारीत असलेल्या शाळेतील काही कर्मचाऱ्यांना पुन्हा स्फोटाचा आवाज ऐकू आला, म्हणून त्यांनी सुरक्षित अंतरावर थांबणे पसंत केले. मंगळवेढा येथील अग्निशामक दलाला घटनेची माहिती देण्यात आली. दलाने घटनास्थळी पोहोचून आग आटोक्यात आणली. तोपर्यंत कामगारांच्या निवासाचे मोठे नुकसान झाले होते; स्फोटामुळे पत्रे उडून गेले होते.

या आगीत कामगार कुटुंबांचे कपडे, घरगुती वापराच्या वस्तू आणि इतर संसारोपयोगी साहित्य नष्ट झाले. चार दुचाकी जळून खाक झाल्या, त्यांपैकी दोन काही महिन्यांपूर्वीच नवीन खरेदी केल्या होत्या. वर्षानुवर्षे कष्ट करून उभा केलेला संसार काही क्षणांत उद्ध्वस्त झाल्याने या कुटुंबांवर मोठे संकट ओढवले आहे. रोजच्या मजुरीवर कुटुंबाचा उदरनिर्वाह करणाऱ्या या कामगारांना मोठा आर्थिक फटका बसला असून, त्यांच्यापुढे पुन्हा नव्याने संसार उभा करण्याचे आव्हान आहे.

स्फोटाच्या ठिकाणापासून काही अंतरावर माध्यमिक शाळा आहे, त्यामुळे विद्यार्थ्यांच्या सुरक्षेचा प्रश्नही ऐरणीवर आला आहे. स्फोट नेमका कशामुळे झाला, याचे कारण अद्याप स्पष्ट झालेले नाही. घटनेची माहिती मिळताच तलाठी, ग्रामसेवक आणि तहसीलदार यांनी घटनास्थळी भेट देऊन पाहणी केली.