घणसोलीत सिडकोच्या भूखंडांवर बिल्डरांची अनधिकृत ऑफिसे, मनसेचे गजानन काळे यांचा आरोप

घणसोली सेक्टर ४ मधील सिडकोच्या भूखंडांवर अनधिकृतपणे ताबा घेतला गेल्याचा आरोप महाराष्ट्र नवनिर्माण सेनेचे नवी मुंबई शहर अध्यक्ष गजानन काळे यांनी केला आहे. या जागांवर बिल्डरांनी आपली ऑफिसे सुरू केली असून तिथे निवासी मालमत्तांच्या 'अडव्हान्स बुकिंग'च्या नावाखाली ग्राहकांकडून लाखो रुपये उकळले जात असल्याचा दावाही त्यांनी केला आहे.

काळे यांच्या म्हणण्यानुसार, सिडकोच्या सेक्टर ०४ मधील प्लॉट नंबर ३०१, ३०७, ३०८ आणि ३११ हे प्लॉट अजून कोणालाही वितरित झालेले नाहीत. तरीही तिथे बिल्डरांची ऑफिसे अनधिकृतपणे चालू आहेत. कृष्णा इमपेरियर आणि सृष्टी बिल्डर यांच्याकडून तिथे बुकिंग ऑफिसे उभारण्यात आली आहेत. तिथे पत्रे आणि बोर्ड लावलेले असून हे बिल्डर लोकांकडून बुकिंगची रक्कम घेत आहेत, असे त्यांनी सांगितले.

घणसोली आणि तळवली परिसरात याआधीही सिडकोच्या अतिक्रमणविरोधी पथकाने अनधिकृत बांधकामे आणि ऑफिसेसवर हातोडा चालवला आहे. मात्र अजूनही अनेक ठिकाणी अशा अनधिकृत हालचाली सुरूच असल्याचा आरोप कार्यकर्त्यांनी केला आहे. अनधिकृत प्रकल्पांमध्ये किंवा घरांच्या आगाऊ बुकिंगच्या नावाखाली ग्राहकांकडून लाखो रुपये उकळले जात असल्याचे समोर आले आहे, असेही म्हटले गेले आहे.

गोरगरीब आणि प्रकल्पग्रस्तांच्या घरांवर बुलडोझर चालवणारी सिडको इथे मात्र शांत का दिसते, असा सवाल काळे यांनी उपस्थित केला आहे. सिडकोचे अधिकारी विनू नायर यांच्यावर अद्याप कोणतीही कारवाई झालेली नाही, याकडेही त्यांनी लक्ष वेधले.

या सगळ्याकडे सिडको आणि सिडकोच्या अधिकाऱ्यांचे दुर्लक्ष होत आहे, असे काळे यांचे म्हणणे आहे. एमआरटीपी अॅक्टनुसार या बिल्डरांवर कारवाई झाली पाहिजे, तसेच सिडको अधिकारी नायर यांच्यावरही कारवाई झाली पाहिजे, अशी मागणी त्यांनी केली. या प्रकरणामागे कोणाचे तरी पाठबळ आहे, असे मत महाराष्ट्र नवनिर्माण सेनेचे नवी मुंबई शहर अध्यक्ष गजानन काळे यांनी व्यक्त केले.