मुख्यमंत्री फडणवीस यांनी नरखेडच्या शेतकरी कुटुंबाच्या घरी साजरी केली भाऊबीज

दुष्काळाचा मार सोसणाऱ्या शेतकऱ्यांना धीर आणि आत्मविश्वास मिळावा, या हेतूने मुख्यमंत्री देवेंद्र फडणवीस यांनी यंदाची दिवाळी एका शेतकरी कुटुंबासोबत साजरी केली. नरखेड तालुक्यातील लोहारी सावंगा गावात शेतकरी रामभाऊ बालपांडे यांच्या घरी त्यांनी रात्रीचा मुक्काम केला.

सकाळी उठल्यावर घरातील महिलांनी केलेला तर्री पोहा मुख्यमंत्र्यांनी नाश्त्याला खाल्ला आणि कुटुंबासोबत दिवाळीचा आनंद वाटून घेतला. घरातून निघताना त्यांनी कुटुंबाचे आभार मानले. त्यांच्यासोबतचा दिवस खूप आनंदात गेला आणि रात्री छान झोप लागली, असे ते म्हणाले.

रामभाऊ यांच्या पत्नी अरुणाताई यांनी भावाप्रमाणे मुख्यमंत्र्यांचे औक्षण करून भाऊबीज साजरी केली. पुढच्या वर्षी दिवाळीला तुमच्या पत्नीलाही (वहिनींना) बरोबर घेऊन या, असा प्रेमाचा आग्रह त्यांनी केला.

मुख्यमंत्र्यांनी सांगितले की त्यांना पोहे खूप आवडतात आणि आठवड्यातून किमान चार दिवस ते नाश्त्याला पोहेच खातात. रात्री थंडी असल्याने कुटुंबाने अंगणात शेकोटी पेटवली होती. त्याबद्दल कुटुंबाने आपल्याला सांगितले नाही, नाहीतर खूप दिवसांनी आपणही शेकोटीचा आनंद घेतला असता, असे मुख्यमंत्री म्हणाले. रामभाऊ आणि अरुणाताई बालपांडे यांनी घरातल्या सदस्याप्रमाणेच त्यांचे स्वागत केले.

त्यांचे मुलगे प्रवीण आणि अजय तसेच सून स्वाती यांनी स्वतःच्या हाताने जेवण तयार केले. कुटुंबातील सात महिन्यांची नात नारायणी हिची ही पहिली दिवाळी होती आणि ती मुख्यमंत्र्यांसोबत साजरी झाली. तिचे वडील प्रवीण यांनी आनंद व्यक्त केला. नारायणी मोठी झाल्यावर तिला मुख्यमंत्र्यांसोबत दिवाळी साजरी केल्याचे फोटो दाखवू, असे ते म्हणाले.

मुख्यमंत्र्यांनी सकाळी शेतकरी कुटुंबाच्या घरीच दिवाळीतील अभ्यंगस्नान केले. त्यानंतर अरुणाताई आणि कुटुंबातील इतर महिलांनी पारंपरिक पद्धतीने त्यांचे औक्षण केले. भाऊबीजेच्या निमित्ताने अरुणाताईंनी कुंकवाचा टिळा लावून त्यांना ओवाळले. मुख्यमंत्र्यांनीही बहिणीला भेटवस्तू देऊन भाऊबीजेची रीत पाळली.

गावातून निघताना पत्रकारांशी बोलताना मुख्यमंत्री फडणवीस म्हणाले की बालपांडे कुटुंबाशी त्यांचा जिव्हाळ्याचा ऋणानुबंध जुळला आहे आणि कुटुंबाने त्यांचा उत्तम पाहुणचार केला. शेतकरी रामभाऊ बालपांडे यांनाही दुष्काळाचा फटका सहन करावा लागला, पण त्यांनी हिंमत हारली नाही, असे ते म्हणाले. कुटुंबातील तीन खातेदारांना कर्जमाफीचा लाभ मिळाला, ही समाधानाची गोष्ट आहे, असेही त्यांनी सांगितले.

बालपांडे कुटुंब पंढरपूरच्या वारीत सहभागी होते आणि विठ्ठलाची उपासना करते, असे मुख्यमंत्र्यांनी सांगितले. अशा कुटुंबांमध्ये कठीण परिस्थितीला तोंड देण्याची ताकद असते, असे ते म्हणाले.

नाश्त्याच्या वेळी मुख्यमंत्र्यांची भेट 75 वर्षांच्या कमलाबाई मानेराव यांच्याशी झाली. वयामुळे काम करता येत नसल्याची अडचण त्यांनी मांडली. शेळीपालनाच्या प्रस्तावाचा विचार व्हावा आणि दिव्यांग मुलाला आर्थिक मदत मिळावी, अशी विनंती त्यांनी केली. या प्रकरणांत तातडीने कार्यवाही करण्याचे निर्देश मुख्यमंत्र्यांनी दिले.

कमलाबाई यांना निराधार अनुदान योजनेचा लाभ मिळवून देता येईल का, याचीही तपासणी करण्यास त्यांनी सांगितले. कुटुंबाच्या नातेवाईक रामेश्वरी सावरकर मुंबईत राहतात. मुख्यमंत्र्यांनी त्यांच्याशी मोबाईलवर संवाद साधला आणि मुंबईत काही अडचण आली तर भेटायला या, असे त्यांना सांगितले.