लोहारी सावंग्यात बावनकुळे जेवणाविना संवादाला, साडेअकराला लोहे कुटुंबासोबत जेवले

दुष्काळी परिस्थितीच्या पार्श्वभूमीवर महाराष्ट्रातील प्रत्येक मंत्र्याने एका शेतकऱ्याच्या घरी मुक्काम करावा आणि तिथेच जेवण करावे, अशी सूचना मुख्यमंत्री देवेंद्र फडणवीस यांनी केली होती. त्यानुसार दिवाळीनिमित्त नागपूर जिल्ह्यातील लोहारी सावंगा गावात मुख्यमंत्री स्वतः रामभाऊ बालपांडे यांच्या घरी मुक्कामी राहिले. त्यांनी जेवणही त्याच घरी केले.

महसूल मंत्री चंद्रशेखर बावनकुळे हेही त्याच लोहारी सावंगा गावात होते. ते नंदुजी लोहे या शेतकऱ्याच्या घरी मुक्कामी राहिले. मात्र काही कारणांमुळे लोहे यांच्या घरी स्वयंपाकाला उशीर झाला. मुख्यमंत्र्यांचे जेवण झाल्यानंतर शेतकऱ्यांसोबत संवाद साधण्याची वेळ आली, तेव्हा बावनकुळे यांचे जेवण झालेच नव्हते.

त्या वेळी काही कार्यकर्त्यांनी बावनकुळे यांना दुसऱ्या एखाद्या घरी जेवून घेण्याचा सल्ला दिला. पण बावनकुळे यांनी वेगळी भूमिका घेतली. कितीही उशीर झाला तरी ज्या शेतकऱ्याने राहायला जागा दिली, त्याच्याच घरी जेवायचे आणि त्या शेतकऱ्याचा स्वाभिमान दुखावू द्यायचा नाही, असे त्यांनी ठरवले.

त्यानंतर शेतकरी संवादाचा कार्यक्रम सुरू झाला आणि बावनकुळे जेवण न करताच त्यात सहभागी झाले. कार्यक्रम संपल्यावर त्यांनी सर्व शेतकऱ्यांचे तक्रार अर्ज स्वीकारले. त्या अर्जांसंदर्भात त्यांनी अधिकाऱ्यांना आवश्यक निर्देशही दिले. हे सगळे आटोपून ते पुन्हा नंदूजी लोहे यांच्या घरी पोहोचले. तोवर सव्वा अकरा वाजले होते. अखेर साडे अकरा वाजता बावनकुळे यांनी लोहे कुटुंबीयांसोबत जेवण केले आणि अशा प्रकारे साधेपणाने दिवाळी साजरी केली.

ज्या शेतकऱ्याने प्रेमाने घरी राहण्यास परवानगी दिली आणि मान दिला, त्याच्या घरी जेवणाला तास-दोन तास उशीर झाला तरी त्या शेतकऱ्याची भावना महत्त्वाची आहे, अशी भूमिका बावनकुळे यांनी व्यक्त केली.

नागपूरचे पालकमंत्री असलेल्या बावनकुळे यांनी गावात मुक्कामी असताना रात्री उशिरा शेकोटीचा आनंदही घेतला. थंडीत शेकोटीजवळ बसून त्यांनी स्थानिक शेतकऱ्यांसोबत संवाद साधला. मुख्यमंत्री फडणवीस दिवाळीनिमित्त लोहारी सावंगा गावात असताना त्यांच्यासोबत बावनकुळे एका शेतकऱ्याच्या घरी राहिले.