एमपीएससी आंदोलनातील विद्यार्थ्यांची अभिजीत दीपके यांनी घेतली भेट; "एका परीक्षेमुळे आयुष्य संपवायचे नाही"

महाराष्ट्र लोकसेवा आयोगाच्या (एमपीएससी) परीक्षा पद्धतीबाबत, तसेच पेपरफुटी, निकालातील पारदर्शकता आणि आपल्या भवितव्याबाबत विद्यार्थ्यांचे आंदोलन सुरू आहे. या आंदोलनादरम्यान सामाजिक कार्यकर्ते अभिजीत दीपके यांनी आंदोलक विद्यार्थ्यांची भेट घेतली आणि त्यांच्याशी संवाद साधला.

या भेटीत विद्यार्थ्यांनी अनेक प्रश्न मांडले. एमपीएससीच्या परीक्षा प्रक्रियेत झालेले बदल, पेपरफुटीचे आरोप आणि तपासणीतील कथित त्रुटी, अशा वेगवेगळ्या मुद्द्यांवर त्यांनी आपले म्हणणे मांडले.

एका विद्यार्थ्याने आपली व्यथा सांगितली. एमपीएससीच्या परीक्षेत अपेक्षित गुण मिळूनही कटऑफमुळे आपली संधी हुकली, असे त्याने सांगितले. परीक्षा प्रक्रियेबद्दल निर्माण झालेल्या संशयामुळे विद्यार्थ्यांच्या मानसिक स्थितीवर परिणाम होत आहे, असेही त्याने सांगितले. हे ऐकल्यावर दीपके यांनी विद्यार्थ्यांना कोणत्याही परिस्थितीत टोकाचे पाऊल न उचलण्याचे आवाहन केले.

"एका परीक्षेमुळे आयुष्य संपवायचे नाही. कुटुंबाचा विचार करा आणि आपल्या हक्कासाठी लढा," असे दीपके यांनी विद्यार्थ्यांना सांगितले. विद्यार्थ्यांच्या प्रश्नांवर बोलताना त्यांनी शिक्षण आणि लोकशाही हक्कांबाबत जनजागृतीची गरज असल्याचे मत व्यक्त केले.

आंदोलनस्थळी विद्यार्थ्यांशी बोलताना एका विद्यार्थिनीने एमपीएससीच्या परीक्षा पद्धतीत वारंवार होणाऱ्या बदलांवर नाराजी व्यक्त केली. पेपरफुटी आणि उत्तरपत्रिका तपासणीतील कथित अनियमिततेमुळे गरीब आणि ग्रामीण विद्यार्थ्यांसमोर मोठे संकट उभे राहिले आहे, असेही तिने सांगितले.

यावर दीपके यांनी टीका केली. परीक्षा घेण्यापेक्षा पैशाच्या जोरावर संधी मिळत असेल, तर परीक्षा पद्धतीवरच प्रश्नचिन्ह निर्माण होते, असे ते म्हणाले. विद्यार्थ्यांच्या भवितव्याशी जोडलेली परीक्षा प्रक्रिया पारदर्शक आणि विश्वासार्ह असणे आवश्यक आहे, असेही त्यांनी नमूद केले.

दुसऱ्या एका विद्यार्थिनीने शिक्षण, रोजगार, सुरक्षितता आणि मतदानाच्या माध्यमातून नागरिकांची भूमिका, या विषयांवर प्रश्न उपस्थित केले. सरकारमुळे शिक्षणासाठी विद्यार्थ्यांवर रस्त्यावर उतरण्याची वेळ का येते, असा सवाल तिने केला. विद्यार्थ्यांनी फक्त पुस्तकांतील आकडेवारी न बघता प्रत्यक्ष परिस्थितीचाही विचार करावा, असे आवाहनही तिने केले.

या प्रश्नांवर बोलताना दीपके यांनी सांगितले की, नागरिकांना आपल्या मूलभूत अधिकारांची आणि कर्तव्यांची जाणीव असणे आवश्यक आहे.