हरमनप्रीत कौरने कप्तानी सोडली; तिचे शिक्षण कुठे आणि किती झाले?

भारतीय महिला क्रिकेट संघाच्या तिन्ही फॉरमॅटचे कर्णधारपद हरमनप्रीत कौरने सोडले आहे. त्यामुळे तिच्या १४ वर्षांच्या कर्णधार म्हणून प्रवासाला पूर्णविराम मिळाला. या काळात तिने वेगवेगळ्या टप्प्यांवर संघाची धुरा सांभाळली आणि अनेक मोठ्या स्पर्धांमध्ये भारताचे नेतृत्व केले.

सोशल मीडियावर तिने एक भावूक संदेश टाकला आहे. त्यात तिने म्हटले आहे की कर्णधार म्हणून हरमनप्रीतचा काळ आता संपला आहे, पण एक खेळाडू म्हणून तिचा प्रवास सुरूच राहील. या पार्श्वभूमीवर तिचे शिक्षण किती झाले आहे, हे पाहूया.

हरमनप्रीत भारतीय महिला क्रिकेट संघाची कर्णधार आणि उत्कृष्ट अष्टपैलू खेळाडू आहे. तिचा जन्म ८ मार्च १९८९ रोजी पंजाबमधील मोगा जिल्ह्यात झाला. तिचे वडील हरमंदर सिंह भुल्लर हे स्वतः खेळाडू होते. त्यांनीच तिला क्रिकेटचे पहिले धडे दिले आणि तेच तिचे पहिले कोच बनले. तिची आई सतविंदर कौर गृहिणी आहेत. लहानपणापासूनच हरमनला क्रिकेटचे प्रचंड वेड होते.

शाळेचे शिक्षण हरमनने मोगा येथेच पूर्ण केले. त्यानंतर तिने ज्ञान ज्योती स्कूल अकादमीत प्रवेश घेतला आणि तिथे क्रिकेटचे प्रशिक्षण सुरू केले. तिथे तिला कोच कमलदीश सिंह सोधी यांचे मार्गदर्शन मिळाले. २०१४ मध्ये ती मुंबईला राहायला गेली आणि भारतीय रेल्वेत नोकरीही सुरू केली.

पदवीचे शिक्षण हरमनप्रीतने २००९ ते २०११ या काळात चौधरी चरण सिंह विद्यापीठातून डिस्टन्स एज्युकेशनद्वारे पूर्ण केले. त्याआधी ती जालंधरमधील एका कॉलेजमध्ये शिकत होती. मात्र क्रिकेट स्पर्धा आणि परीक्षांच्या तारखा एकाच वेळी आल्यामुळे तिला कॉलेज बदलावे लागले. तिने समाजशास्त्र, राज्यशास्त्र, इंग्रजी आणि सामान्य ज्ञान हे विषय घेऊन शिक्षण घेतले.

२०१८ मध्ये तिच्या पदवीवर प्रश्न उपस्थित झाले होते. त्यावेळी तिला डीएसपी पदावरून हटवण्यात आल्याचा वादही झाला. तिने मात्र आपल्या बचावात सांगितले की तिच्या सर्व पदव्या कायदेशीर आणि वैध आहेत.

क्रिकेटमधील तिची कारकीर्द मार्च २००९ मध्ये पाकिस्तानविरुद्धच्या एकदिवसीय सामन्यातून सुरू झाली. त्यानंतर जून २००९ मध्ये तिने इंग्लंडविरुद्ध टी-२० मध्ये पदार्पण केले. आज ती महिला क्रिकेटमधील सर्वात यशस्वी कर्णधारांपैकी एक मानली जाते. तिच्या नेतृत्वाखाली भारताने पहिल्यांदाच विश्वचषक ट्रॉफी जिंकली आहे.

आशियाई क्रीडा स्पर्धेतही तिच्या नेतृत्वाखाली भारताला मोठे यश मिळाले. संघाने सलग दोन वेळा आशियाडचे सुवर्णपदक जिंकले. गेल्या महिन्यात निशिन येथे भारतीय संघाने दुसऱ्यांदा आशियाडचे गोल्ड आपल्या नावावर केले. कर्णधार म्हणून हरमनप्रीतचे हे शेवटचे मोठे यश ठरले.