इंदुरीकर महाराजांनी लासूर स्टेशन येथील कीर्तनात व्यसन, आत्महत्या आणि शाळांवर मांडले मत

लासूर स्टेशन येथे झालेल्या कीर्तनात कीर्तनकार इंदुरीकर महाराज यांनी समाजातील अनेक प्रश्नांवर परखड शब्दांत भाष्य केले. वाढती व्यसनाधीनता, कुटुंबातील नात्यांमध्ये आलेला दुरावा, शेतकरी आत्महत्या आणि ग्रामीण शिक्षणाचे महत्त्व या विषयांना त्यांनी आपल्या कीर्तनातून हात घातला आणि समाजप्रबोधन केले.

संत ज्ञानेश्वर महाराज यांच्या प्रतिभेचा गौरव करताना इंदुरीकर महाराज म्हणाले, की ज्ञानेश्वरी हा केवळ ग्रंथ नाही. अवघ्या नऊ वर्षांच्या वयात निर्माण केलेला तो अमृताचा सागर आहे. ज्ञानेश्वरीतील आध्यात्मिक आणि वैचारिक विचारांचे महत्त्व सांगताना ते पुढे म्हणाले, की आम्ही केवळ कीर्तनकार नसून विठ्ठल-रखुमाईचा संदेश समाजापर्यंत पोहोचवणारे सेवक आहोत.

हा कार्यक्रम शिवसेनेचे उपजिल्हाप्रमुख नितीन कांजुणे पाटील आणि नाभिक समाज, लासूर स्टेशन यांच्या वतीने आयोजित करण्यात आला होता. विधान परिषदेचे माजी विरोधी पक्षनेते आमदार अंबादास दानवे यांची कार्यक्रमाला प्रमुख उपस्थिती होती.

आजचा तरुण व्यसनाच्या विळख्यात अडकत असल्याबद्दल इंदुरीकर महाराज यांनी चिंता व्यक्त केली. तरुणांनी व्यसनांपासून दूर राहावे, आई-वडिलांच्या अपेक्षा पूर्ण कराव्यात आणि आपल्या आयुष्याला योग्य दिशा द्यावी, असे आवाहन त्यांनी केले. मुलींनी घर सोडून जाण्याच्या घटनांचा उल्लेख करत त्यांनी पालक आणि मुले यांच्यातील संवाद, परस्पर विश्वास आणि संस्कार यांचे महत्त्व अधोरेखित केले.

कीर्तन हे केवळ मनोरंजनाचे साधन नाही. समाजप्रबोधन करण्याचे आणि तरुणांना योग्य दिशा दाखवण्याचे ते प्रभावी माध्यम आहे, असे त्यांनी सांगितले. इतिहास हा आपल्या कर्तृत्वाने लिहिला जातो, असे नमूद करून त्यांनी देशासाठी बलिदान देणाऱ्या वीरांच्या योगदानाचा गौरव केला. आध्यात्मिक विचारांसोबतच सामाजिक जबाबदारी, कौटुंबिक मूल्ये आणि जीवनाकडे सकारात्मक दृष्टिकोनाने पाहण्याचा संदेश त्यांच्या कीर्तनातून देण्यात आला.

दुष्काळ आणि शेतकऱ्यांच्या समस्यांवर बोलताना आत्महत्या हा कोणत्याही समस्येवरचा उपाय नाही, असे त्यांनी स्पष्ट केले. संकटांचा धैर्याने सामना करून जीवनात मार्ग शोधण्याची गरज आहे, असे सांगत त्यांनी शेतकऱ्यांच्या प्रश्नांकडे लक्ष वेधले. ग्रामीण भागातील विद्यार्थ्यांना दर्जेदार शिक्षण मिळावे यासाठी जिल्हा परिषद शाळा टिकवणे आणि त्यांचे महत्त्व जपणे आवश्यक आहे, असे मतही त्यांनी व्यक्त केले.

कार्यक्रमाला महाराष्ट्र नाभिक महामंडळाचे राज्य सल्लागार दिलीप अनर्थे, सुधाकर आहेर, अशोक पवार, सोमिना तावरे आणि उद्योजक रितेश चंडालिया यांच्यासह अनेक मान्यवर उपस्थित होते. कार्यक्रम यशस्वी करण्यासाठी मोहसीन बागवान, आकाश भगुरे, राजू तुपे, विजय भाले, शुभम धने, ज्ञानेश्वर औटी आणि इतर कार्यकर्त्यांनी विशेष परिश्रम घेतले.