छोटा भीम आता रंगमंचावर, १७ ऑक्टोबरला मुंबईत संगीतनाट्याचा प्रयोग

लहान मुलांमध्ये लोकप्रिय असलेले छोटा भीम हे ॲनिमेटेड पात्र आता प्रेक्षकांना थेट रंगमंचावर पाहायला मिळणार आहे. ग्रीन गोल्ड ॲनिमेशन आणि नीमट्री एंटरटेनमेंट यांच्या संयुक्त विद्यमाने साकारलेल्या 'छोटा भीम : द म्युझिकल' या भव्य संगीतनाट्याचा प्रयोग १७ ऑक्टोबर रोजी मुंबईतील नेहरू सेंटर सभागृहात होणार आहे.

गेल्या आठवड्यात या संगीतनाट्याचे तीन प्रयोग सादर झाले होते. त्या प्रयोगांना मुलांबरोबरच पालकांनीही उत्स्फूर्त प्रतिसाद दिला. हा प्रतिसाद मिळाल्यानंतर आता मुंबईतील प्रयोगाची घोषणा करण्यात आली आहे.

या संगीतनाट्यात ढोलकपूरमधील भीम आणि त्याच्या मित्रांची रोमांचक मोहीम रंगमंचावर साकारण्यात आली आहे. राजकुमारी इंदुमतीला 'थुंडाझॉर्क' च्या तावडीतून मुक्त करण्यासाठी भीम आणि त्याचे मित्र निघतात. या साहसी प्रवासात ते जादुई जंगले, पाण्याखालील राज्ये, जादुई बेटे, वाळवंटे आणि बर्फाच्छादित पर्वत पार करतात. प्रवासातील थरारक प्रसंग, आकर्षक पात्रे आणि नेत्रदीपक दृश्यरचना हे या संगीतनाट्याचे प्रमुख आकर्षण ठरणार आहे.

या निर्मितीमध्ये 30 कलाकार, रंगमंचामागील 12 जणांचा चमू आणि सहा तांत्रिक कर्मचारी सहभागी आहेत. निर्मितीची धुरा भूमी नाथवाणी यांनी सांभाळली असून, अमात्य गोराडिया यांनी दिग्दर्शन केले आहे. श्रुती शर्मा यांनी सर्जनशील प्रमुख म्हणून काम पाहिले आहे.

कथानकातील वेगवेगळ्या ठिकाणांचा प्रेक्षकांना प्रत्यक्ष अनुभव मिळावा, यासाठी आकर्षक वेशभूषा, एलईडीच्या माध्यमातून साकारलेली दृश्ये आणि कल्पक प्रकाशयोजना वापरण्यात आली आहे. त्यामुळे लहान मुलांसह संपूर्ण कुटुंबासाठी हा एक वेगळा मनोरंजक अनुभव ठरेल, अशी अपेक्षा आहे.

ग्रीन गोल्ड ॲनिमेशनचे संस्थापक आणि व्यवस्थापकीय संचालक राजीव चिलाका म्हणाले, की एखाद्या लोकप्रिय पात्राची खरी ताकद त्याच्या मूळ माध्यमापलीकडे जाऊन प्रेक्षकांशी जोडले जाण्यात असते. छोटा भीमचा प्रवास एका ॲनिमेटेड पात्रापासून सुरू झाला; मात्र आज तो लाखो मुले आणि त्यांच्या कुटुंबांच्या आयुष्याचा अविभाज्य भाग बनला आहे.

'छोटा भीम : द म्युझिकल' चा प्रयोग 17 ऑक्टोबर रोजी मुंबईतील नेहरू सेंटर सभागृहात होणार आहे. या कार्यक्रमाची तिकिटे BookMyShow या ऑनलाइन तिकीटविक्री मंचावर उपलब्ध आहेत.